୩ ଲକ୍ଷ ଟଙ୍କାର ଗଞ୍ଜେଇ ଜବତ

ରାଇଘର (ବଡ଼ ଖବର ବ୍ୟୁରୋ): ଓଡ଼ିଶାରୁ ଛତିଶଗଡ଼କୁ ଗଞ୍ଜେଇ ଚୋରା ଚାଲାଣ ସମୟରେ ଫରସଗାଓଁ ପୁଲିସ ଆଜି ଚଢାଉ କରି ଏକ ବାଇକ ସହ ୩ ଲକ୍ଷ ଟଙ୍କାର ଗଞ୍ଜେଇ ଜବତ କରିବା ସହିତ ଜଣେ ଯୁବକଙ୍କୁ ଗିରଫ କରି କୋର୍ଟ ଚାଲାଣ କରିଥିବା ଜଣାପଡିଛି । ଯୁବକ ଜଣକ ରାଇଘରର ଆସୀମ ରାୟଙ୍କ ପୁଅ ଅଭିଷେକ ରାୟ ବୋଲି ପୁଲିସ ପ୍ରକାଶ କରିଛି । ଗତ କାଲି ସକାଳୁ ଛତିଶଗଡ଼ ଅନ୍ତର୍ଗତ କୋଣ୍ଡାଗାଁ ଜିଲ୍ଲାର ଫରସଗାଓଁ ପୁଲିସ ଓଡ଼ିଶାରୁ ଛତିଶଗଡ଼କୁ ଗଞ୍ଜେଇ ଚାଲାଣ ହେଉଥିବା କୌଣସି ସୂତ୍ରରୁ ଖବର ପାଇ ଫରସଗାଓଁ ରାସ୍ତାରେ ଯାଞ୍ଚ କରୁଥିବାବେଳେ ଏକ ବାଇକରେ ଅଭିଷେକ ରାୟ ବ୍ୟାଗରେ ଗଞ୍ଜେଇ ନେଇ ଯିବା ସମୟରେ ଧରା ପଡ଼ିଥିଲେ ।

ପୁଲିସ ବାଇକଟିକୁ ଅଟକାଇ ଯାଞ୍ଚ କରିବା ବେଳେ ଅଭିଷେକ ନିକଟରୁ ୨୯ କିଲୋ ଗଞ୍ଜେଇ ଭର୍ତ୍ତି ଥିବା ଏକ ବ୍ୟାଗ ପୁଲିସ ହାତରେ ପଡିଥିଲା । ଗଞ୍ଜେଇର ଆନୁମାନିକ ମୂଲ୍ୟ ୩ ଲକ୍ଷ ଟଙ୍କା ହେବ ବୋଲି ପୁଲିସ ସୂଚନା ଦେଇଥିବା ବେଳେ ଉକ୍ତ ଗଞ୍ଜେଇ ବ୍ୟାଗ ଓ ବାଇକଟିକୁ ଜବତ କରିବା ସହିତ ଅଭିଷେକ ରାୟଙ୍କୁ ଗିରଫ କରି କୋର୍ଟ ଚାଲାଣ କରିଥିବା ଜଣାପଡିଛି । ଏ ନେଇ ଫରସଗାଓଁ ଥାନାରେ ଏକ ମାମଲା ରୁଜୁ ହୋଇଛି ।