ଫୁଲବାଣୀ (ବଡ଼ ଖବର ବ୍ୟୁରୋ): ଅନଲାଇନ ପରୀକ୍ଷା ଦାବିରେ ତାତିଲେ ଛାତ୍ରଛାତ୍ରୀ । କରୋନା ସଂକ୍ରମଣ ସଂଖ୍ୟା ଦିନକୁ ଦିନ ବଢିବଢି ଚାଲିଛି। କନ୍ଧମାଳ ଜିଲ୍ଲାରେ କରୋନା ପଜିଟିଭ ସଂଖ୍ୟା ୬୦ ରେ ପହଞ୍ଚିଲାଣି । କଲେଜ ହଷ୍ଟେଲ ନିକଟରେ କୋଭିଡ଼ ଟେଷ୍ଟ ସେଣ୍ଟର ରହିଛି । ଜିଲ୍ଲାର ୩୪ ଟି ସ୍ଥାନରେ ଏବେ ପ୍ରଶାସନ ମାଇକ୍ରୋ କଣ୍ଟେନମେଣ୍ଟ ଘୋଷଣା ମଧ୍ୟ କରିଛି । କରୋନା ସଂକ୍ରମଣ ପାଇଁ ଅନେକ ସ୍ଥାନରେ କଲେଜ ବନ୍ଦ ରହିବା ସହ ହଷ୍ଟେଲ ମଧ୍ୟ ଖାଲି କରାଗଲାଣି ।
କେବଳ ସେତିକି ନୁହେଁ କରୋନା ସଂକ୍ରମଣକୁ ଦୃଷ୍ଟିରେ ରଖି ସରକାର ସିବିଏସଇ ପରୀକ୍ଷା ବାତିଲ କରିଦେଲେଣି । ଦ୍ବାଦଶ ପରୀକ୍ଷା ସ୍ଥଗିତ ରଖାଯାଇଛି। ଏପରି ପରିସ୍ଥିତିରେ ଅଟୋନମସ କଲେଜ ପରୀକ୍ଷାକୁ ଅନଲାଇନ କରିବାରେ କ୍ଷତି କ’ଣ ବୋଲି ଛାତ୍ରଛାତ୍ରୀ ପ୍ରଶ୍ନ କରିବା ସହ ଗୁରବାର ସକାଳୁ ଧାରଣାରେ ବସିଛନ୍ତି । ଦାବି ପୂରଣ ନହେବାଯାଏ ଧାରଣା ଚାଲିବ ବୋଲି ଛାତ୍ରଛାତ୍ରୀମାନେ କହିଛନ୍ତି । ଏନେଇ କଲେଜ ଅଧ୍ୟକ୍ଷ ପଞ୍ଚାନନ ବେହେରାଙ୍କୁ ପଚରାଯାଇଥିଲା ।
ତାଙ୍କ ହାତରେ କିଛି କ୍ଷମତା ନଥିବା ସେ କହିଛନ୍ତି । ସରକାର ଓ ପ୍ରଶାସନ ଯାହା ପଦକ୍ଷେପ ନେବେ ବୋଲି କହିଛନ୍ତି । ସରକାର ଅଫଲାଇନରେ ପାଠପଢ଼ା ଓ ପରୀକ୍ଷା ପାଇଁ ନିଷ୍ପତ୍ତି ନେଇ ଚିଠି କରିଛନ୍ତି ବୋଲି ଅଧ୍ୟକ୍ଷ କହିଛନ୍ତି। ଏନେଇ ସେ ପ୍ରଶାସନର ଦୃଷ୍ଟି ଆକର୍ଷଣ କରିବେ ବୋଲି ଅଧ୍ୟକ୍ଷ ପଞ୍ଚାନନ ବେହେରା କହିଛନ୍ତି ।
