ଭୁବନେଶ୍ୱର (ବଡ଼ ଖବର ବ୍ୟୁରୋ): ଆଜି ପୂର୍ବତନ ପ୍ରଧାନମନ୍ତ୍ରୀ ସ୍ୱର୍ଗତଃ ପିଭି ନରସିହ୍ମା ରାଓଙ୍କ ୧୦୦ତମ ଜନ୍ମବାର୍ଷିକୀ । ୨୮ ଜୁନ୍ ୧୯୨୧ରେ ଏବେର ତେଲେଙ୍ଗାନାରେ ତାଙ୍କର ଜନ୍ମ ହୋଇଥିଲା । ଭାରତର ଅର୍ଥନୀତି ସୁଧାରକ ଭାବେ ତାଙ୍କୁ ସଦା ସ୍ମରଣ କରାଯାଏ । ୧୯୯୧ରୁ ୧୯୯୬ ଯାଏଁ ସେ ଦେଶର ପ୍ରଧାନମନ୍ତ୍ରୀ ଭାବେ ଦାୟିତ୍ୱ ତୁଲାଇଥିଲେ । ସେ ଦାୟିତ୍ୱ ନେବା ପୂର୍ବରୁ ଭାରତୀୟ ଅର୍ଥବ୍ୟବସ୍ଥା କଷ୍ଟକର ସମୟ ଦେଇ ଗତି କରୁଥିଲା ।
ତାଙ୍କରି ସମୟରେ ଦେଶରେ ଆର୍ଥିକ ଉଦାରୀକରଣର ପ୍ରକ୍ରିୟା ଆରମ୍ଭ ହୋଇଥିଲା । ବିଦେଶୀ ପୁଞ୍ଜି ପାଇଁ ଥିବା ପ୍ରତିବନ୍ଧକକୁ ସେ କୋହଳ କରିଥିଲେ । ସେ ହିଁ ମନମୋହନ ସିଂଙ୍କୁ ରାଜନୀତିକୁ ଆଣି ଦେଶର ଅର୍ଥମନ୍ତ୍ରୀର ଦାୟିତ୍ୱ ଦେଇଥିଲେ । କଂଗ୍ରେସର ନେତା ହୋଇଥିଲେ ବି ସବୁ ଦଳର ନେତା ତାଙ୍କୁ ଆଦର କରୁଥିଲେ । ତାଙ୍କ ଉଦ୍ୟମରେ ହିଁ ଦେଶର ଅର୍ଥନୀତି ଅଭିବୃଦ୍ଧି ଆଡକୁ ଗତି କରିଥିଲା । ପରବର୍ତ୍ତୀ ସମୟରେ ଅଟଳ ବିହାରୀ ବାଜପାୟୀ ଓ ମନମୋହନ ସିଂ ଏହାକୁ ଆଗକୁ ବଢାଇଥିଲେ । ଦେଶ ପାଇଁ ତାଙ୍କର ଅନେକ ଅବଦାନ ଥିଲେ ମଧ୍ୟ ତାଙ୍କୁ ଯେଉଁ ସମ୍ମାନ ମିଳିବା କଥା, ସେହି ପରିମାଣରେ ମିଳିପାରି ନାହିଁ । ୨୩ ଡିସେମ୍ବର ୨୦୦୪ରେ ସେ ଆଖି ବୁଜିଥିଲେ ।
ତାଙ୍କ ମୃତ୍ୟୁ ବେଳେ ଦେଶରେ ତାଙ୍କରି ଦଳ କଂଗ୍ରେସ ସରକାରରେ ଥିଲା, ତାଙ୍କ ରାଜନୈତିକ ଶିଷ୍ୟ ମନମୋହନ ସିଂ ପ୍ରଧାନମନ୍ତ୍ରୀ ଥିଲେ, ତଥାପି ସେ ସେହି ସମ୍ମାନରୁ ବଞ୍ଚିତ ହୋଇଥିଲେ, ଯାହାର ସେ ହକଦାର । ତେବେ ତାଙ୍କ କାର୍ଯ୍ୟ ପାଇଁ ଦେଶ ତାଙ୍କୁ ଜଣେ ମହାନ ପ୍ରଧାନମନ୍ତ୍ରୀ ଭାବେ ନିଶ୍ଚୟ ମନେ ରଖିବ । ୧୦୦ ତମ ଜନ୍ମବାର୍ଷିକୀ ଅବସରରେ ପିଭି ନରସିହ୍ମା ରାଓଙ୍କୁ ଶ୍ରଦ୍ଧାଞ୍ଜଳି ।
