ଭୁବନେଶ୍ୱର(ବଡ଼ ଖବର ବ୍ୟୁରୋ): ଭାରତ ଗୋଟିଏ ପଦକ ପାଇସାରିଥିବା ବେଳେ ଏବେ ଆଉ ଏକ ପଦକ ପାଇବାର ଆଶା ଦେଖାଦେଇଛି । ମହିଳା ବକ୍ସର ଲଭଲିନା ବୋର୍ଗୋହେନ୍ ସେମିଫାିନାଲ ରାଉଣ୍ଡରେ ପ୍ରବେଶ କରିଛନ୍ତି । କ୍ୱାର୍ଟର ଫାଇନାଲରେ ଲଭଲିନା ପୂର୍ବତନ ୱାର୍ଲ୍ଡ ଚାମ୍ପିଅନଚେନ୍ ନିଏନ ଚିନଙ୍କୁ ୪-୧ ପଏଣ୍ଟରେ ପରାସ୍ତ କରିଛନ୍ତି । ଏହାସହ ଏକ ପଦକ ମଧ୍ୟ ସୁନିଶ୍ଚିତ କରିଛନ୍ତି । ଆସାମର ଏହି ୨୩ ବର୍ଷୀୟା ବକ୍ସର ତାଇପେଇର ପ୍ରତିଯୋଗୀଙ୍କ ଉପରେ ଭାରି ପଡ଼ିଥିଲେ ।
ତେବେ ସେମି ଫାଇନାଲ୍ରେ ପ୍ରବେଶ କରିଥିବା ଯୋଗୁ ଲଭଲିନା ଗୋଟିଏ ପଦକ ପାଇବା ନିଶ୍ଚିତ ହୋଇଯାଇଛି। କାରଣ ସେମି ଫାଇନାଲ୍ରେ ପରାଜିତ ହେଉଥିବା ଦୁଇ ବକ୍ସରଙ୍କୁ ବ୍ରୋଞ୍ଜ ପଦକ ପ୍ରଦାନ କରାଯାଏ। ତେଣୁ ମ୍ୟାରୀ କମ୍ ଓ ବିଜେନ୍ଦ୍ର ସିଂହଙ୍କ ପରେ ଅଲିମ୍ପିକ୍ସରେ ପଦକ ଜିତିବାରେ ଲଭଲିନା ହେବେ ତୃତୀୟ ଭାରତୀୟ ବକ୍ସର। ସୂଚନାଯୋଗ୍ୟ, ଚଳିତ ଟୋକିଓ ଅଲିମ୍ପିକ୍ସରେ ଭାରତକୁ ପ୍ରଥମ ପଦକ ଦେଇଛନ୍ତି ମୀରାବାଈ ଚାନୁ। ସେ ଭାରୋତ୍ତୋଳନରେ ୪୯ କେଜି ମହିଳା ବର୍ଗରେ ରୌପ୍ୟ ପଦକ ଜିତିଛନ୍ତି।
