ଲଗାତର ବଢ଼ୁଛି ତେଲ ଦର
ଭୁବନେଶ୍ୱର(ବଡ଼ ଖବର ବ୍ୟୁରୋ): ଲଗାତର ସାତଦିନ ହେବ ଉଭୟ ପେଟ୍ରୋଲ ଓ ଡିଜେଲର ମୂଲ୍ୟ ବଢିବାରେ ଲାଗିଛି । ଦେଶର ପ୍ରମୁଖ ତୈଳ ବିପଣନ କମ୍ପାନୀ ଭାରତୀୟ ତୈଳ ନିଗମର ସୂଚନା ଅନୁସାରେ ସୋମବାର ଭୁବନେଶ୍ୱରରେ ଡିଜେଲ ୩୯ ପଇସା ଏବଂ ପେଟ୍ରୋଲ ୩୦ ପଇସା ବଢିଛି । ଫଳରେ ଏଠାରେ ଡିଜେଲ ଲିଟର ପିଛା ୧୦୧.୬୨ଟଙ୍କା ଏବଂ ପେଟ୍ରୋଲ ୧୦୫.୩୫ ଟଙ୍କାରେ ବିକ୍ରି ହେଉଛି ।
ଗତ ୧୮ ଦିନ ମଧ୍ୟରେ ପେଟ୍ରୋଲ ୩.୩୧ଟଙ୍କା ଏବଂ ଡିଜେଲ ୫.୦୧ ଟଙ୍କା ବୃଦ୍ଧି ପାଇଥିବା ଉତ୍କଳ ପେଟ୍ରୋଲିୟମ ଡିଲର ଆସୋସିଏଶନ ପକ୍ଷରୁ ସୂଚନା ମିଳିଛି । ସେହିଭଳି କଟକ ସହରରେ ଡିଜେଲ ଲିଟର ପିଛା ୧୦୧.୯୬ ଟଙ୍କା ଏବଂ ପେଟ୍ରୋଲ ୧୦୫.୭୧ ଟଙ୍କାରେ ପହଞ୍ଚିଛି ।
ତେଲ ଦର ରାଜ୍ୟର ମାଲକାନଗିରିରେ ସର୍ବାଧିକ ପେଟ୍ରୋଲ ୧୧୦.୯୪ ଟଙ୍କା ଥିବା ବେଳେ ଡିଜେଲ ୧୦୭.୦୨ଟଙ୍କା ଏବଂ ସର୍ବନିମ୍ନ ଦର ଜଗତସିଂହପୁରରେ ପେଟ୍ରୋଲ ୧୦୪.୮୭ ଟଙ୍କା ଓ ଡିଜେଲ ୧୦୧.୧୩ରେ ପହଞ୍ଚିଛି ବୋଲି ଆସୋସିଏଶନ ପକ୍ଷରୁ କୁହାଯାଇଛି । ତେଲ ଦର ବୃଦ୍ଧି ଯୋଗୁ ଏହାର ପ୍ରଭାବ ଅତ୍ୟାବଶ୍ୟକ ସାମଗ୍ରୀ ଦର ଉପରେ ପ୍ରଭାବ ପଡ଼ିଛି । ବିଶେଷକରି ଡିଜେଲ ଦର ବୃଦ୍ଧି ଯୋଗୁ ପରିବହନ ଜନିତ ସମସ୍ୟା ଅଧିକ ଦେଖାଦେଇଛି ।
