ବିହାର ବିଧାନସଭା ନିର୍ବାଚନ: ଏନଡିଏର ଆସନ ବୁଝାମଣା

ପାଟନା, (ବଡ଼ ଖବର ବ୍ୟୁରୋ): ଚଳିତ ମାସ ୨୮ତାରିଖରୁ ୩ଟି ପର୍ୟ୍ୟାୟରେ ବିହାର ବିଧାନସଭା ନିର୍ବାଚନ ଅନୁଷ୍ଠିତ ହେବ। ନଭେମ୍ବର ୧୦ରେ ଫଳାଫଳ ଘୋଷଣା କରାଯିବ। ଆଜି ବିଜେପି ଓ ଜେଡିୟୁ ମଧ୍ୟରେ ଆସନ ବୁଝାମଣା ନେଇ ଆନୁଷ୍ଠାନିକ ଭାବେ ଘୋଷଣା କରାଯାଇଛି। ସାମ୍ବାଦିକ ସମ୍ମିଳନୀରେ ଉଭୟ ଦଳ ଏହି ଘୋଷଣା କରିଛନ୍ତି। ସାମ୍ବାଦିକ ସମ୍ମିଳନୀ ପୂର୍ବରୁ ମୁଖ୍ୟମନ୍ତ୍ରୀ ନୀତୀଶ କୁମାରଙ୍କ ବାସଭବନରେ ଏକ ବୈଠକ ଅନୁଷ୍ଠିତ ହୋଇଥିଲା। ଏଥିରେ ବିହାର ବିଜେପି ଦାୟିତ୍ୱରେ ଥିବା ଦେବେନ୍ଦ୍ର ଫର୍ଣ୍ଣାଣ୍ଡିସ୍, ସୁଶୀଲ ମୋଦୀଙ୍କ ସମେତ ଅନେକ ବିଜେପି ନେତା ଉପସ୍ଥିତ ଥିଲେ। ଜେଡିୟୁ ୧୧୫ ଆସନରେ ଏବଂ ବିଜେପି ୧୨୧ ଆସନରେ ପ୍ରତିଦ୍ୱନ୍ଦ୍ୱିତା କରିବେ।

ସେହିପରି ଜୀତନରାମ ମାଁଝୀଙ୍କ ଦଳ ହିନ୍ଦୁସ୍ଥାନ ଆୱାମ ମୋର୍ଚ୍ଚା (ହାମ୍) ୭ ଆସନରେ ଲଢ଼ିବ। ଖୁବଶୀଘ୍ର ପ୍ରାର୍ଥୀମାନଙ୍କ ନାମ ଘୋଷଣା କରାଯିବ ବୋଲି ବିଜେଡି ଓ ଜେଡିୟୁ ନେତାମାନେ ସାମ୍ବାଦିକ ସମ୍ମିଳନୀରେ ଘୋଷଣା କରିଛନ୍ତି। ରାମ ବିଳାସ ପାଶ୍ୱାନଙ୍କ ପାର୍ଟି ଏଲଜେପି ଅଲଗା ହେବା ନେଇ ନୀତୀଶ କୁମାର କହିଛନ୍ତି ଯେ ସେ ବିଜେପି-ଜେଡିୟୁ ସହାୟତାରେ ରାଜ୍ୟସଭାକୁ ଯାଇଛନ୍ତି। ସୁଶୀଲ ମୋଦୀ କହିଛନ୍ତି ଯେ ନୀତୀଶ କୁମାରଙ୍କ ନେତୃତ୍ୱକୁ ସମ୍ମାନ ଦେଇ ଏନଡିଏରେ ରହିବେ। ଏନଡିଏ ମଧ୍ୟ ନୀତୀଶ କୁମାରଙ୍କୁ ନେତା ବୋଲି ଘୋଷଣା କରିଛି। ନୀତୀଶ କୁମାରଙ୍କୁ ମୁଖ୍ୟମନ୍ତ୍ରୀ ପ୍ରାର୍ଥୀ ଭାବେ ସୁଶୀଲ କୁମାର ମୋଦୀ ଘୋଷଣା କରିଛନ୍ତି।