ନୂଆଦିଲ୍ଲୀ(ବଡ଼ ଖବର ବ୍ୟୁରୋ): ଦିନକୁ ଦିନ ଅସମ୍ଭାଳ ହେଉଛି ତେଲ ଦର । ଆଜି ଲଗାତାର ପଞ୍ଚମ ଦିନ ପାଇଁ ଦେଶରେ ପେଟ୍ରୋଲ ଏବଂ ଡିଜେଲ ଦର ବୃଦ୍ଧି ଘଟିଛି। ଏହାର ପ୍ରତିବାଦରେ ଜାତୀୟ କଂଗ୍ରେସ ୧୫ ଦିନିଆ ଆନ୍ଦୋଳନର ଡାକରା ଦେଇଛି। ଆସନ୍ତାମାସ ୧୪ ତାରିଖରୁ ନଭେମ୍ବର ୨୯ ତାରିଖ ପର୍ଯ୍ୟନ୍ତ ଏହି ଆନ୍ଦୋଳନ ହେବ। ଏନେଇ ସୂଚନା ଦେଇଛନ୍ତି କଂଗ୍ରେସର ସାଧାରଣ ସଂପାଦକ କେ ସି ବେଣୁଗୋପାଳ। ସେ କହିଛନ୍ତି, ଏହି ୧୫ ଦିନିଆ ଆନ୍ଦୋଳନରେ ଗୋଟିଏ ସପ୍ତାହ ପାଇଁ ପଦଯାତ୍ରା ହେବ।
ଦେଶବ୍ୟାପୀ କଂଗ୍ରେସ କମିଟି ଗୁଡ଼ିକ ସେମାନଙ୍କ ଅଞ୍ଚଳରେ ପଦଯାତ୍ରା କରିବେ। ଅନ୍ୟପକ୍ଷରେ କଂଗ୍ରେସ ସାଧାରଣ ସଂପାଦିକା ପ୍ରିୟଙ୍କା ଗାନ୍ଧିଙ୍କ ସମେତ ଅନ୍ୟ ନେତାମାନେ ତେଲ ଦରବୃଦ୍ଧି ପାଇଁ ଆଜି ମୋଦୀ ସରକାରଙ୍କୁ ସମାଲୋଚନା କରିଛନ୍ତି। ଟ୍ବିଟ୍ କରି ପ୍ରିୟଙ୍କା କହିଛନ୍ତି, ମୋଦୀ ସରକାର ଜନସାଧାରଣଙ୍କୁ ଅସୁବିଧାରେ ପକାଇବାରେ ବଡ଼ ରେକର୍ଡ କରିଛନ୍ତି।
