ଭୁବନେଶ୍ୱର(ବଡ଼ ଖବର ବ୍ୟୁରୋ): ସାରା ରାଜ୍ୟକୁ ବ୍ୟାପିଲାଣି ମମିତା ନିଆଁ । ଦିନକୁ ଦିନ ଉଗ୍ର ହେବାରେ ଲାଗିଛି କ୍ୟାପଟେନ ହଟାଅ ଦାବି । ଗୃହ ରାଷ୍ଟ୍ରମନ୍ତ୍ରୀ କ୍ୟାପ୍ଟନ ଦିବ୍ୟଶଙ୍କରଙ୍କ ଅଡ଼ୁଆ ବଢ଼ିବାରେ ଲାଗିଛି । କଟକରୁ କଳାହାଣ୍ଡି, ଭୁବନେଶ୍ୱରରୁ ବଲାଙ୍ଗୀର ସବୁଠି ଆକ୍ରୋଶର ନିଆଁ । ଆଜି ମଧ୍ୟ ଦିବ୍ୟଶଙ୍କରଙ୍କ ଇସ୍ତଫା ଦାବିରେ ରାସ୍ତାକୁ ଓହ୍ଲାଇ ଥିଲା ବିଜେପି । ଭୁବନେଶ୍ୱର ବିଜେପି ଯୁବ ମୋର୍ଚ୍ଚା ପକ୍ଷରୁ ଘଟଣାର ନିରପେକ୍ଷ ତଦନ୍ତ ଦାବିରେ ଡିସିପି ଅଫିସ ଘେରାଓ କରାଯାଇଥିଲା । ସହ ସହ ସଂଖ୍ୟାରେ ଯୁବ ମୋର୍ଚାର କର୍ମକର୍ତା ଡିସିପି ଅଫିସକୁ ଧସେଇ ପଶିବା ପାଇଁ ଉଦ୍ୟମ କରିଥିଲେ । ଢେର ସମୟ ଧରି ପୋଲିସ ସହ ଧସ୍ତାଧସି ମଧ୍ୟ ହୋଇଥିଲା। ମମିତା ହତ୍ୟାକାଣ୍ଡ ଘଟଣାରେ ସାମ୍ନା ଆସିଥିବା ଯୌନ କେଲେଙ୍କାରୀରେ ମନ୍ତ୍ରୀ ଦିବ୍ୟଶଙ୍କର ମିଶ୍ରଙ୍କ ସମ୍ପୃକ୍ତି ଅଭିଯୋଗ ଆସିବ ପରେ ବିରୋଧୀ ସରକାରଙ୍କୁ ଆଟାକ କରିଛନ୍ତି ।
ମନ୍ତ୍ରୀଙ୍କୁ ବରଖାସ୍ତ ଓ ଘଟଣାର ନିରପେକ୍ଷ ନ୍ୟାୟ ଦାବିରେ ପ୍ରତିଦିନ ରାସ୍ତାକୁ ଓହ୍ଲାଇଛନ୍ତି ବିରୋଧୀ । କେତେବେଳେ ନବୀନ ନିବାସ ଘେରୁଛନ୍ତି ତ କେତେବେଳେ ଅଣ୍ଡାମାଡ଼ କରୁଛନ୍ତି , ପୁଣି କେତେବେଳେ ଡିଜି ଓ ଡିସିପି ଅଫିସ ଘେରୁଛନ୍ତି । ଏତେ ପରେବି ସରକାର କିନ୍ତୁ ଚୁପ । କାର୍ୟ୍ୟାନୁଷ୍ଠାନ ବଦଳରେ ଓଲଟା ଓକିଲାତି କରୁଛନ୍ତି ଶାସକ ଦଳର ନେତା । ବିରୋଧୀ କିନ୍ତୁ ନଛୋଡ ବନ୍ଧା । ଗୋଟିଏ ଜିଦ କ୍ୟାପ୍ଟନ ତୁମେ ଇସ୍ତଫା ଦିଅ । ମମତା ପ୍ରସଙ୍ଗରେ କେବେ ଭାଙ୍ଗିବ ସରକାରଙ୍କ ନିଦ। ପୂର୍ବରୁ ଅନେକ ଘଟଣାରେ ବିବାଦକୁ ଆସିଥିବା ନେତାଙ୍କୁ ବିଦା କରିଛନ୍ତି ନବୀନ । କିନ୍ତୁ କ୍ୟାପ୍ଟନଙ୍କୁ କାହିଁକି ସୁରକ୍ଷା ଦିଆଯାଉଛି ତାକୁ ନେଇ ବିରୋଧୀ ମଧ୍ୟ ପ୍ରଶ୍ନ କରିଛନ୍ତି ।
