ନୂଆଦିଲ୍ଲୀ (ବଡ଼ ଖବର ବ୍ୟୁରୋ): ଗୌତମ ଆଦାନୀ ପ୍ରସଙ୍ଗରେ ସାରା ଦେଶରେ ଚର୍ଚ୍ଚା ଜୋରଦାର ଜାରି ରହିଛି । ଏହା ମଧ୍ୟରେ ଲୋକସଭାରେ କଂଗ୍ରେସ ସାଂସଦ ରାହୁଲ ଗାନ୍ଧି ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଟାର୍ଗେଟ କରିଛନ୍ତି । ରାଷ୍ଟ୍ରପତିଙ୍କ ଅଭିଭାଷଣରେ ଧନ୍ୟବାଦ ପ୍ରସ୍ତାବ ବେଳେ ରାହୁଲ କହିଛନ୍ତି, ତାଙ୍କର କନ୍ୟାକୁମାରୀଠୁ କାଶ୍ମୀର ଯାଏଁ ପଦଯାତ୍ରା ସମୟରେ ସବୁଠି ସେ କେବଳ ଜଣିଏ ଶିଳ୍ପପତିଙ୍କ ନାଁ ଶୁଣିଲେ । ସେ ହେଉଛନ୍ତି ଗୌତମ ଆଦାନୀ । ଏହା ସହ ଗୌତମ ଆଦାନୀ ଓ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ମଧ୍ୟରେ କ’ଣ ସଂପର୍କ ରହିଛି ବୋଲି ପ୍ରଶ୍ନ କରିଛନ୍ତି ।
ଏହା ସହ ସେ ଉଭୟଙ୍କ ଏକ ଫଟୋଚିତ୍ରକୁ ମଧ୍ୟ ଲୋକସଭାରେ ପ୍ରଦର୍ଶିତ କରିଛନ୍ତି । ରାହୁଲ କହିଛନ୍ତି, ତାମିଲନାଡୁ, କେରଳରୁ ନେଇ ହିମାଚଳପ୍ରଦେଶ ଯାଏଁ ଆମେ ସବୁଠି କେବଳ ଆଦାନୀଙ୍କ ନାଁ ଶୁଣିଲୁ । ଲୋକେ ମୋତେ ପଚାରୁଥିଲେ, ଆଦାନୀ କେମିତି ଯେକୌଣସି ବିଜନେସ ବି କଲେ ସେଥିରେ କେବେ ବିଫଳ ହେଉନାହାନ୍ତି । ରାହୁଲ ଅଭିଯୋଗ କରିଛନ୍ତି, ନରେନ୍ଦ୍ର ମୋଦି ଗୁଜରାଟ ମୁଖ୍ୟମନ୍ତ୍ରୀ ଥିବାବେଳେ ଆଦାନୀଙ୍କ ସହ ସଂପର୍କ ଆରମ୍ଭ ହୋଇଥିଲା ।
ଆଦାନୀ ମୋଦିଙ୍କ ବିଶ୍ୱସ୍ତ ହୋଇ ରହିଲେ ଓ ସବୁବେଳେ ସାହାଯ୍ୟ କଲେ । ମୋଦି ୨୦୧୪ରେ ଦିଲ୍ଲୀ ସିଂହାସନରେ ପହଂଚିବା ପରେ ଆଦାନୀଙ୍କ ବ୍ୟବସାୟ ମ୍ୟାଜିକ ଭଳି ସଫଳତା ପାଇବାକୁ ଲାଗିଲା । ତେବେ କେନ୍ଦ୍ରମନ୍ତ୍ରୀ କିରଣ ରିଜଜ୍ଜୁ ରାହୁଲଙ୍କୁ କାଉଂଟର ଆଟାକ କରିଛନ୍ତି । ରାହୁଲ ଯେଉଁ ଅଭିଯୋଗ କରୁଛନ୍ତି, ତାହାର ପ୍ରମାଣ ରଖିବାକୁ ଆହ୍ୱାନ ଦେଇଛନ୍ତି । ସେପଟେ ସଂସଦ ଫ୍ଲୋରରେ ପ୍ରଧାନମନ୍ତ୍ରୀ ଓ ଗୌତମ ଆଦାନୀଙ୍କ ଫଟୋ ପ୍ରଦର୍ଶନକୁ ବାଚସ୍ପତି ଓମ ବିର୍ଲା ମଧ୍ୟ ନାପସନ୍ଦ କରିଛନ୍ତି ।
