ନୂଆଦିଲ୍ଲୀ (ବଡ଼ ଖବର ବ୍ୟୁରୋ):ପଶ୍ଚିମାକାଶରେ ମହାଜାଗତିକ ଦୃଶ୍ୟ । ଜଗତ ଦେଖିବ ଚନ୍ଦ୍ର-ବୃହସ୍ପତି-ଶୁକ୍ରଙ୍କ ମହାମିଳନ । ଜହ୍ନର ନିକଟତର ହେଉଛି ବୃହସ୍ପତି । ତଳକୁ ରହିଛି ଶୁକ୍ର । ସଂଧ୍ୟା ହେଉ ହେଉ ପୃଥିବୀ ଆକାଶରୁ ସ୍ପଷ୍ଟ ଦେଖିହେଉଛି ମହାକାଶର ଏହି ଅଭୂତପୂର୍ବ ଦୃଶ୍ୟ । ଏ ସଂପର୍କରେ ଟ୍ୱିଟ୍ କରିଛି ନାସା ।
ତେବେ ନାସାର ଗବେଷଣା କହୁଛି ମାର୍ଚ୍ଚ ୧ରେ ଏହି ତିନି ସବୁଠୁ ବେଶି ନିକଟତର ହେବେ । ସେତେବେଳେ ଏହାକୁ ଅଧିକ ସ୍ପଷ୍ଟ ଭାବେ ଦେଖିହେବ । ନାସା ଲେଖିଛି, ପଶ୍ଚିମ ଆକାଶରେ ଏକ ମହାମିଳନ ହେବାକୁ ଯାଉଛି । ଚନ୍ଦ୍ର ବୃହସ୍ପତିର ନିକଟରେ ରହିଛି । ଏମାନଙ୍କ ତଳକୁ ରହିଛି ଶୁକ୍ର ଗ୍ରହ ।
ବୃହସ୍ପତି ଓ ଶୁକ୍ର ପରସ୍ପରର ଆହୁରି ନିକଟତର ହେବ । ମାର୍ଚ୍ଚ ୧ରେ ଏମାନେ ସବୁଠୁ ବେଶି ନିକଟତର ଥିବେ । ଏହା ସହ ନାସା ଲେଖିଛି, ଆପଣ ଆକାଶରେ ଏହି ବିରଳ ଦୃଶ୍ୟ ଦେଖିଛନ୍ତି କି? ଯଦି ଦେଖିଛନ୍ତି ଫଟୋ ପୋଷ୍ଟ କରନ୍ତୁ । ଏହାପରେ ସାରା ବିଶ୍ୱର ଅନେକ ଟ୍ୱିଟର ୟୁଜର ନାସାର ଏହି ଟ୍ୱିଟରେ ଫଟୋ ସେୟାର କରୁଥିବାର ଦେଖିବାକୁ ମିଳିଛି । ଏହି ଦୃଶ୍ୟ ଆମ ଦେଶରେ, ଏପିରିକି ଆମେ ରାଜ୍ୟର ଆକାଶରେ ଖାଲି ଆଖିରେ ମଧ୍ୟ ଦେଖିହେବ । ଦୁଇ/ତିନି ବର୍ଷ ଅନ୍ତରାଳରେ ଆକାଶରେ ଏମିତି ଦୃଶ୍ୟ ଦେଖିବାକୁ ମିଳେ । ଫେବ୍ରୁଆରୀ ପହିଲାରୁ ଚନ୍ଦ୍ର ଓ ଏହି ଦୁଇ ଉଜ୍ଜ୍ୱଳତମ ଗ୍ରହ ପରସ୍ପରର ନିକଟତର ହେବା ଆରମ୍ଭ କରିଥିଲେ । ମାର୍ଚ୍ଚ ପହିଲା ପରେ ଧୀରେ ଧୀରେ ପୁଣି ପୂର୍ବ ସ୍ଥାନକୁ ଫେରିଯିବେ ।
