ଭୁବନେଶ୍ୱର (ବଡ଼ ଖବର ବ୍ୟୁରୋ): ଜଗନ୍ନାଥ ମନ୍ଦିର ସମ୍ପର୍କିତ ଫାଇଲ ହଜିବା ଅତ୍ୟନ୍ତ ଚିନ୍ତାଜନକ ଏବଂ ଉଦବେଗ ଜନକ ଘଟଣା । କିନ୍ତୁ ଫାଇଲ ହଜି ନାହିଁ । ଫାଇଲ ଲୁଚାଇ ରଖାଯାଇଛି ବୋଲି କହିଛନ୍ତି ବରିଷ୍ଠ ନେତା ବିଜୟ ମହାପାତ୍ର । ଜଗନ୍ନାଥ ମନ୍ଦିର ସମ୍ପର୍କରେ ଏଭଳି ତଥ୍ୟ ତା ଭିତରେ ଥିବ, ଯାହାକୁ ବୋଧେ ଲୋକଲୋଚନକୁ ଆଣିବା ପାଇଁ ସେମାନେ ଚାହାନ୍ତି ନାହିଁ । ସେଥିପାଇଁ ହଜି ଯିବା ପନ୍ଥାର ଆଶ୍ରୟ ନିଆଯାଇଛି । ଯଦି ଜଗନ୍ନାଥ ମନ୍ଦିର ଫାଇଲ ହଜିଯିବ, ତେବେ ଓଡ଼ିଶାରେ ଶାସନ ରହିବା ଉଚିତ ନୁହେଁ । ରାଜ୍ୟ ସରକାର ଜାଣିଶୁଣି ବିପଦକୁ ନିମନ୍ତ୍ରଣ କରୁଛନ୍ତି । ସବୁବେଳେ ସମସ୍ତେ କହୁଛନ୍ତି, ସେ ଆମର ଆରାଧ୍ୟ ଦେବତା ।
ଯେତେ ପ୍ରକାର ଅବହେଳା କରାଯାଇପାରିବ, ଜଗନ୍ନାଥ ମନ୍ଦିର ପାଇଁ, ବିଧି ବିଭାଗ ଓ ମନ୍ଦିର ପ୍ରଶାସନ ଏବଂ ସରକାର ସମସ୍ତେ ମିଳିମିଶି କରୁଛନ୍ତି । ଖାଲି ଉପରକୁ ଦେଖାଇବା ପାଇଁ ପରିକ୍ରମା ପ୍ରକଳ୍ପ । ଶ୍ରୀମନ୍ଦିର ପ୍ରଶାସକ ନିଯୁକ୍ତି ପ୍ରସଙ୍ଗରେ ସୁପ୍ରିମକୋର୍ଟ ମଧ୍ୟ ପୂର୍ଣ୍ଣକାଳୀନ କରିବା ପାଇଁ କହି ସାରିଛନ୍ତି । କିନ୍ତୁ ଏ ପର୍ଯ୍ୟନ୍ତ ରାଜ୍ୟ ସରକାର କରୁନାହାନ୍ତି । ଏବେ ଯିଏ ପ୍ରଶାସକ ଅଛନ୍ତି, ସେ ନିଯୁକ୍ତ ହେବା ଦିନ ଠାରୁ ମାତ୍ର ଦୁଇ ତିନି ଥର ଯାଇଛନ୍ତି । ଏଥିରୁ ଅନୁମାନ କରାଯାଇପାରିବ ଯେ ମନ୍ଦିର ପ୍ରଶାସନ କେଉଁ ଅବସ୍ଥାରେ ପହଞ୍ଚିଛି । ପ୍ରଶାସକ ଯଦି ନଯିବେ ମନ୍ଦିର ନୀତି ବ୍ୟବସ୍ଥା ଚାଲିବ କେମିତି ? ସେଠି ଫାଇଲ ହଜିବ, ଆହୁରି ଅନେକ ଅଘଟଣ ଘଟିବ ।
