ନୂଆଦିଲ୍ଲୀ (ବଡ଼ ଖବର ବ୍ୟୁରୋ): ଧନୀ ଦେଶରେ ବଢୁଛି ଆତ୍ମହତ୍ୟା ପ୍ରବୃତ୍ତି । ଜୀବନରେ ନିରାଶ ହୋଇଥିବା ଲୋକଙ୍କ ସଂଖ୍ୟା ବଢିବାରେ ଲାଗିଛି । ଜାପାନର ୫୦ ପ୍ରତିଶତ ଯୁବବର୍ଗ ଆତ୍ମହତ୍ୟା ବିଷୟରେ ଚିନ୍ତା କରୁଛନ୍ତି । ଏନେଇ ଏକ ସର୍ଭେ କରିଛି ଆମେରିକା । ଅଣ-ସରକାରୀ ସଂଗଠନ ନିପନ ଫାଉଣ୍ଡେଶନ ଦ୍ୱାରା କରାଯାଇଥିବା ଏହି ସର୍ଭେ ଅନୁଯାୟୀ, ଜାପାନର ପ୍ରାୟ ୫୦ ପ୍ରତିଶତ ଆତ୍ମହତ୍ୟା ବିଷୟରେ ଚିନ୍ତା କରୁଛନ୍ତି। ଅଧିକାଂଶ ଯୁବକ ଗବେଷକମାନଙ୍କୁ କହିଥିଲେ. ସେମାନେ ସେମାନଙ୍କର ଚିନ୍ତାଧାରା ବିଷୟରେ କାହା ସହିତ କଥାବାର୍ତ୍ତା କରନ୍ତି ନାହିଁ । ପାଞ୍ଚ ଲକ୍ଷରୁ ଅଧିକ ଯୁବବର୍ଗଙ୍କୁ ନେଇ ଏହି ସର୍ଭେ କରାଯାଇଥିଲା । ୫,୦୧,୦୧୮ ଜଣଙ୍କୁ ନେଇ କରାଯାଇଥିବା ସର୍ଭେରେ ରହିଥିଲେ ୧୮ ରୁ ୨୯ ବର୍ଷ ବୟସର ଯୁବକ, ଯୁବତୀ ।
୧୪,୮୧୯ ଜଣଙ୍କ ଉତ୍ତର ଠିକ ବୋଲି ଜଣାପଡିଛି। ଆତ୍ମହତ୍ୟା ଚିନ୍ତାଧାରାର ଶିକାର ହୋଇଥିବା ୫୬.୬ ପ୍ରତିଶତ ଯୁବବର୍ଗ କହିଛନ୍ତି. ସେମାନେ ଏ ବିଷୟରେ କାହା ସହିତ କଥାବାର୍ତ୍ତା କରନ୍ତି ନାହିଁ। ୧୨.୪ ପ୍ରତିଶତ ଯୁବବର୍ଗ କହିଛନ୍ତି, ଏପରି ଚିନ୍ତା ଆସିବା ପରେ ସେମାନେ ନିଜ ସାଙ୍ଗମାନଙ୍କ ସହ କଥା ହୋଇଛନ୍ତି। ୧୧.୭ ପ୍ରତିଶତ ଯୁବକ ଏପରି ଚିନ୍ତାଧାରା ସହିତ କହିଛନ୍ତି, ସେମାନେ ଏହି ଭାବନା ବିଷୟରେ ନିଜ ମା ସହିତ କଥା ହୋଇଥିଲେ । ସର୍ଭେ ରିପୋର୍ଟ ଅନୁଯାୟୀ, ଉତ୍ତର ପଠାଇଥିବା ୪୪.୮ ପ୍ରତିଶତ ଯୁବବର୍ଗ କହିଛନ୍ତି ସେମାନେ ନିଶ୍ଚିତ ଭାବରେ କିଛି ଦିନ ମଧ୍ୟରେ ଆତ୍ମହତ୍ୟା କରିବାକୁ ଚିନ୍ତା କରିଛନ୍ତି। ଆତ୍ମହତ୍ୟା ଚିନ୍ତାଧାରା ଥିବା ଯୁବବର୍ଗମାନଙ୍କ ମଧ୍ୟରୁ ୪୦.୮ ପ୍ରତିଶତ କହିଛନ୍ତି ସେମାନେ ଅତୀତରେ ଆତ୍ମହତ୍ୟା ପ୍ରସ୍ତୁତି କରିସାରିଛନ୍ତି। କିନ୍ନର ସମ୍ପ୍ରଦାୟର ଲୋକଙ୍କ ମଧ୍ୟରେ ଆତ୍ମହତ୍ୟା ଚିନ୍ତା ଅଧିକ ଆସିଥିବା ସର୍ଭେରୁ ଜଣାପଡିଛି । ଯେଉଁମାନେ ଯୌନ ନିର୍ଯାତନାର ଶିକାର ହୋଇଛନ୍ତି, ସେମାନଙ୍କର ଆତ୍ମହତ୍ୟା ଚିନ୍ତାଧାରା ମଧ୍ୟ ଅଧିକ।
