ବଢୁଛି ଭୂପିନ୍ଦରଙ୍କ ବିରୋଧରେ ସ୍ୱର

କଳାହାଣ୍ଡି (ବଡ଼ ଖବର ବ୍ୟୁରୋ): ପାଖେଇ ଆସୁଛି ନିର୍ବାଚନ । ୨୪ ସାଧାରଣ ନିର୍ବାଚନ ପାଇଁ କଳାହାଣ୍ଡି ଜିଲ୍ଲାର ରାଜନୈତିକ ପାଣିପାଗ ମଧ୍ୟ ରୋଚକ ହେବାରେ ଲାଗିଛି । ଗୋଟିଏ ପଟେ ହେଭିୱେଟ ନେତାମାନେ କର୍ମୀଙ୍କୁ ମନେଇବାକୁ ପ୍ରୟାସ କଲେଣି । ଅନ୍ୟପଟେ ନୂଆ ନୂଆ ଆଶାୟୀ ନେତାମାନେ ଲୋକଙ୍କୁ ନିଜ ସପକ୍ଷରେ ଆଣିବାକୁ ଉଦ୍ୟମ କରୁଛନ୍ତି । ଏମିତିରେ କଳାହାଣ୍ଡି ନର୍ଲା ନିର୍ବାଚନ ମଣ୍ଡଳୀରେ ପୁରୁଣା ନେତା ଓ ଅସନ୍ତୁଷ୍ଟ ନେତାଙ୍କ ବୈଠକ ବିଜେଡି ଶିବିରରେ ଚର୍ଚ୍ଚାର ବିଷୟ ପାଲଟିଛି । ଜିଲ୍ଲା ବିଜେଡି ସଭାପତି ଓ କାର୍ଯ୍ୟକାରୀ ସଭାପତିଙ୍କ ଦ୍ୱାରା ଦଳରୁ କୋଣଠେସା ଅନୁଭବ କରୁଥିବା କିଛି ଅସନ୍ତୁଷ୍ଟ ନେତା କିଛିଦିନ ତଳେ ନର୍ଲା ନିର୍ବାଚନ ମଣ୍ଡଳୀର ଜୋରାଡୋବ୍ରାସ୍ଥିତ ମଧୁବନରେ ଏକ ମେଳି କରିଥିଲେ । ତେବେ ଏହି ଭୋଜିଭାତରେ ଶାରଦା ପ୍ରସନ୍ନ ସ୍ୱାଇଁଙ୍କ ନେତୃତ୍ୱ କରିଥିଲେ । ଖାଲି ଭୋଜିଭାତ ହୋଇଥିଲା ତାହା ନୁହେଁ । ଭୋଜିଭାତର ଅସର ମଧ୍ୟରେ ଆଗକୁ ନର୍ଲାରେ କେମିତି ବିଜେଡି ଶକ୍ତିଶାଳୀ ହେବ ଓ ନୂଆ ମୁହଁ ନେତୃତ୍ୱ ନେବେ ସେ ବିଷୟରେ ମଧ୍ୟ ଚର୍ଚ୍ଚା ହୋଇଥିଲା । କେତେକେ କର୍ମୀ ଏବେର ବିଧାୟକ ଭୂପିନ୍ଦର ସିଂଙ୍କୁ ନେଇ ପ୍ରଶ୍ନ ଉଠାଇଥିଲେ ।