କଂଗ୍ରେସ ଓ ସମାଜବାଦୀ ପାର୍ଟିର ଆସନ ବଣ୍ଟନ ଆଲୋଚନା ଶେଷ

ଉତ୍ତରପ୍ରଦେଶ  (ବଡ଼ ଖବର ବ୍ୟୁରୋ) ଶେଷ ହେଲା କଂଗ୍ରେସ ଏବଂ ସମାଜବାଦୀ ପାର୍ଟି ମଧ୍ୟରେ ଆସନ ବୁଝାମଣା ନେଇ ବୈଠକ । ଲୋକସଭା ନିର୍ବାଚନ ପାଇଁ ଉତ୍ତରପ୍ରଦେଶରେ କଂଗ୍ରେସ ଏବଂ ସମାଜବାଦୀପାର୍ଟି ମଧ୍ୟରେ ଦୀର୍ଘଦିନ ହେବ ବିବାଦ ଲାଗିରହିଥିଲା । ମୋରିଦାବାଦର ତିନୋଟି ଆସନକୁ ନେଇ ଉପୁଜିଥିଲା ବିବାଦ । ଏନେଇ ସମାଜବାଦୀ ପାର୍ଟିର ମୁଖ୍ୟ ଅଖିଳେଶ ଯାଦବ କହିଛନ୍ତି ଯେ କଂଗ୍ରେସ ସହିତ ଆସନ ବାଣ୍ଟିବା ଚୁକ୍ତି ଶେଷ ନହେବା ପର୍ଯ୍ୟନ୍ତ ଦଳ ରାହୁଲ ଗାନ୍ଧୀଙ୍କ ଭାରତ ଯୋଡ ନ୍ୟାୟ ଯାତ୍ରାରେ ଅଂଶଗ୍ରହଣ କରିବେ ନାହିଁ। ସୂଚନା ଅନୁସାରେ କଂଗ୍ରେସ ମୁରାଦାବାଦ ଏବଂ ବାଲିଆ ଆସନ ଚାହୁଁଥିବାବେଳେ ସମାଜବାଦୀ ପାର୍ଟି ଏହି ଆସନ ଛାଡିବାକୁ ପ୍ରସ୍ତୁତ ନୁହେଁ ।

ମୁରାଦାବାଦ ଆସନକୁ ନେଇ ଉଭୟ କଂଗ୍ରେସ ଓ ସମାଜବାଦୀ ପାର୍ଟି ଅଡି ବସିଛନ୍ତି । ସେହି ଭଳି କଂଗ୍ରେସ ବିଜନୋର ଆସନ ମଧ୍ୟ ଚାହୁଁଛି । ୩ଟି ଆସନକୁ ନେଇ ଉଭୟ ଦଳ ମଧ୍ୟରେ ଦ୍ୱନ୍ଦ୍ୱ ରହିଛି । ବାଲିଆ, ମୁରାଦାବାଦ ଓ ବିଜନୋର ଏହି ୩ ଆସନକୁ ନେଇ ଉଭୟ ଦଳ ମଧ୍ୟ ଆସନ ବୁଝାମଣା ହୋଇପାରୁନାହିଁ । ତେଣୁ ଏଭଳି ସ୍ଥିତିରେ ଆଗାମୀ ନିର୍ବାଚନରେ କଂଗ୍ରେସ ଓ ସମାଜବାଦୀ ପାର୍ଟି ମିଳିତ ଭାବେ ଲଢିବେ କି ନାହିଁ ତାହାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି । ଯଦି ଉଭୟ ଦଳ ଉତ୍ତରପ୍ରଦେଶରେ ମିଳିତ ଭାବେ ନିର୍ବାଚନ ନ ଲଢନ୍ତି ତେବେ ଏହା ଇଣ୍ଡିଆ ମେଣ୍ଟକୁ ବଡ ଝଟକା ଲାଗିବ । ଯାହା ଶାସକ ବିଜେପିକୁ ଫାଇଦା ହେବ ବୋଲି ଚର୍ଚ୍ଚା ହେଉଛି ।