ଦେଶୀ ବନ୍ଧୁକ ଜବତ, ଜଣେ ଗିରଫ
ପାରଳାଖେମୁଣ୍ଡି (ବଡ଼ ଖବର ବ୍ୟୁରୋ): ଗଜପତି ଜିଲ୍ଲା ଗୋଷାଣୀ ବ୍ଳକ ଗୁରାଣ୍ଡି ଥାନା ପକ୍ଷରୁ ପାଟ୍ରୋଲିଙ୍ଗ କରୁଥିବା ସମୟରେ କାଇଠଡା ଗ୍ରାମ ଠାରେ ଗୋଟିଏ ଦେଶୀ ବନ୍ଧୁକ ସହ ଜଣକୁ ଗିରଫ କରାଯାଇଥିବା ଜଣାପଡିଛି । ଗୁରାଣ୍ଡି ଥାନା ଅଧିକାରୀ ରବୀନ୍ଦ୍ର ପାତ୍ରଙ୍କ ତତ୍ତ୍ଵାବଧାନରେ ଗୋଷାଣୀ ବଡ଼ ନିଳାପୁରୁ ଗ୍ରାମାଞ୍ଚଳରେ ଗୁରାଣ୍ଡି ପୁଲିସ୍ ଟିମ୍ ପାଟ୍ରୋଲିଙ୍ଗ କରିଥିଲେ । ଏହି ସମୟରେ କାଇଠଡା ଗ୍ରାମାଞ୍ଚଳ ଠାରେ ବିଳମ୍ବିତ ରାତ୍ରରେ ବାହାରେ ବୁଲୁଥିବା ଜଣେ ବ୍ୟକ୍ତିଙ୍କୁ ସନ୍ଦେହରେ ପଚରାଉଚରା କରୁଥିଲେ ।
ଇତି ମଧ୍ୟରେ ତାଙ୍କ ପାଖରେ ଗୋଟିଏ ଦେଶୀ ବନ୍ଧୁକ ଥିବା ଦେଖିବାକୁ ପାଇଥିଲେ । ତୁରନ୍ତ ଅଭିଯୁକ୍ତ ସୁଜନ ମଣ୍ଡଳକୁ ଗିରଫ କରି ଦେଶୀ ବନ୍ଧୁକ ଜବତ କରିଥିଲେ । ଏ ନେଇ ଗୁରାଣ୍ଡି ଥାନାରେ ଏକ ମାମଲା ରୁଜୁ ହୋଇଛି । ଏହାସହ ବେଆଇନ ଅସ୍ତ୍ରଶସ୍ତ୍ର ରଖିବା ଆଇନ ବଳରେ ଦଫା ଲାଗିଛି । ଏହି ଘଟଣା ତଦନ୍ତ ଭାର ଏଏସଆଇ ସୁଶାନ୍ତ ଦଳେଇ କରୁଛନ୍ତି । ଗିରଫ ଅଭିଯୁକ୍ତ ସୁଜନ ମଣ୍ଡଳକୁ ଆଜି କୋର୍ଟ ଚାଲାଣ କରାଯାଇଛି ।