ଲକ୍ଷ୍ମୀପୁର (ବଡ଼ ଖବର ବ୍ୟୁରୋ): କୋରାପୁଟ ଜିଲ୍ଲା ଲକ୍ଷ୍ମୀପୁର ନିର୍ବାଚନମଣ୍ଡଳୀର ବିଜେଡି ଦଳରେ ବିଧାୟକ ପ୍ରାର୍ଥୀକୁ ନେଇ ବିଦ୍ରୋହ ଆରମ୍ଭ ହୋଇଥିବା ଦେଖିବାକୁ ମିଳିଛି । ଗୋଟିଏ ପଟେ ପୂର୍ବତନ କଂଗ୍ରେସ ବିଧାୟକ କୈଳାସ ଚନ୍ଦ୍ର କୁଲେସିକା ୨୦୧୯ ସାଧାରଣ ନିର୍ବାଚନରେ ତାଙ୍କ ନିକଟତମ ପ୍ରତିଦ୍ୱନ୍ଦୀ ବିଜେଡି ଦଳର ବିଧାୟକ ପ୍ରଭୁ ଜାନିଙ୍କ ଠାରୁ ମାତ୍ର ଅଳ୍ପ ବ୍ୟବଧାନ ୨୨୯ ଖଣ୍ଡ ଭୋଟରେ ହାରି ଯାଇଥିଲେ । ଏହାପରେ କୈଳାସ ଚନ୍ଦ୍ର କୁଲେସିକା କଂଗ୍ରେସ ଛାଡ଼ି ବିଜେଡିରେ ଯୋଗଦେଇଥିଲେ ।
ବିଜେଡି ଦଳରେ ଥାଇ ବିଧାୟକ ପ୍ରାର୍ଥୀ ଭାବେ ନିଜ ଦଳକୁ ପରିଚିତ କରାଇବା ପାଇଁ ପ୍ରାଣପଣେ ଚେଷ୍ଟା ଜାରି ରଖି ସାଧାରଣ ଲୋକଙ୍କ ସୁଖଦୁଃଖ ଜାନିଯାତ୍ରାରେ ସାମିଲ ହୋଇ ସଂଗଠନକୁ ମଜଭୁତ କରିଥିଲେ । ନିକଟରେ କୈଳାସ ଚନ୍ଦ୍ର କୁଲେସିକା ଓ ତାଙ୍କ ଧର୍ମପତ୍ନୀ ସୁଆଇ କୁଲେସିକା ଲକ୍ଷ୍ମୀପୁର ବ୍ଲକ ଅଧ୍ୟକ୍ଷାଙ୍କୁ ଶଙ୍ଖଭବନରୁ ଡାକରା ଆସିଥିଲା । ଯାହା ପରେ କୈଳାସଙ୍କ ଲକ୍ଷ୍ମୀପୁର ନିର୍ବାଚନମଣ୍ଡଳୀର ବିଜେଡି ଦଳର ବିଧାୟକ ପ୍ରାର୍ଥୀ ଟିକଟ୍ ଏକ ପ୍ରକାର ସୁନିଶ୍ଚିତ ହୋଇଛି । ଯାହାକୁ ନେଇ ଲକ୍ଷ୍ମୀପୁର ଓ ଦଶମନ୍ତପୁର କିଛି ବିଜେଡି କର୍ମୀ ବିରୋଧ କରି ବିଦ୍ରୋହ କରିଥିବା ଦେଖିବାକୁ ମିଳିଛି।
