ଚାନ୍ଦବାଲି, (ବଡ଼ ଖବର ବ୍ୟୁରୋ): ଚାନ୍ଦବାଲି ବ୍ଲକ ଭାଟପଡ଼ା ପଞ୍ଚାୟତର ଅସୀମା ରାଣୀ ମୁଦୁଲି ଓ ତାଙ୍କ ସ୍ୱାମୀ ସୁକାନ୍ତ ମୁଦୁଲି ୭ଦଫା ଦାବିନେଇ ଗତକାଲିଠାରୁ ଚାନ୍ଦବାଲି ବ୍ଲକ କାର୍ୟ୍ୟାଳୟ ଆଗରେ ଆମରଣ ଅନଶନରେ ବସିଛନ୍ତି । ସୂଚନା ଅନୁଯାୟୀ, ନେହେରୁ ଶିଶୁ ଉଦ୍ୟାନରେ କାର୍ୟ୍ୟାଦେଶ ନେଇ ବିକାଶ ମୂଳକ କାର୍ୟ୍ୟ କରିଥିଲେ ଏହି ଦମ୍ପତି । କାର୍ୟ୍ୟ ସରିବା ପରେ ବ୍ଲକ ପ୍ରଶାସନ ଅଧିକାରୀ ଓ ରାଜନୈତିକ ଚାପରେ ତାଙ୍କର ବକେୟା ପାଉଣାକୁ ଦୀର୍ଘଦିନ ହେବ ବନ୍ଦକରି ରଖିଛନ୍ତି । ଯେତେ ଗୁହାରି କଲେ ମଧ୍ୟ କେହି ଶୁଣୁନାହାନ୍ତି । ଶେଷରେ ଦମ୍ପତି ନିଜ ହକ୍ ପାଇଁ ସ୍ଥାନୀୟ ବିଧାୟକ, ବିଡିଓ ଏମିତିକି ଜିଲ୍ଲାପାଳଙ୍କ ଦ୍ୱାରସ୍ଥ ମଧ୍ୟ ହୋଇଥିଲା । କିନ୍ତୁ ତାଙ୍କ ବକେୟା ପାଉଣା ତାଙ୍କୁ ମିଳିପାରି ନ ଥିଲା । ତେଣୁ ଉଭୟ ଗତକାଲିଠାରୁ ବ୍ଲକ ଅଫିସରେ ଆମରଣ ଅନଶନରେ ବସିଛନ୍ତି ।
