ରଣପୁର,(ବଡ଼ ଖବର ବ୍ୟୁରୋ): ନୟାଗଡ଼ ଜିଲ୍ଲା ରଣପୁର ବ୍ଲକ ବନ୍ଧମୁଣ୍ଡା ପଞ୍ଚାୟତ ସାନଚାକୁଣ୍ଡା ଗାଁ ହେଉଛି ଆଦିବାସୀ ଅଧ୍ୟୁଷିତ ଇଲାକା । ଗାଁରେ ଥିବା ନଳକୂଅଗୁଡିକ ଅଚଳ ହୋଇ ପଡି ରହିଥିଲା । ଲୋକେ ମଇଳା ଓ ଦୂଷିତ କେନାଲ ପାଣିକୁ ପାନୀୟଜଳ ଭାବେ ବ୍ୟବହାର କରୁଥିଲେ । ଦୂଷିତ କେନାଲ ପାଣି ପିଇ ଲୋକେ ବିଭିନ୍ନ ରୋଗର ଶିକାର ମଧ୍ୟ ହେଉଥିଲେ । ଅକ୍ଟୋବର ୨୧ରେ ସାନଚାକୁଣ୍ଡା ଗାଁର ଜଳ ସମସ୍ୟା ଖବରକୁ “ବଡ଼ ଖବର’ରେ ସ୍ଥାନୀତ କରାଯାଇଥିଲା । ଖବର ପ୍ରସାରଣ ହେବାର ସାତଦିନ ପରେ ତତ୍ପରତା ଦେଖାଇଛି ପ୍ରଶାସନ । ଆରଡବ୍ଲୁଏସଏସ ଅଧିକାରୀ ଗାଁରେ ଥିବା ସମସ୍ତ ନଳକୂଅ ମରାମତି କରାଇଛନ୍ତି ।
ଗାଁଠାରୁ ୧ କିଲୋମିଟର ଦୂରରେ ଥିବା କେନାଲର ପାଣି ଲୋକଙ୍କ ଶୋଷ ମେଣ୍ଟାଉଥିଲା । ଏନେଇ ବାରମ୍ବାର ପ୍ରଶାସନିକ ଅଧିକାରୀଙ୍କ ନିକଟରେ ଗାଁ ଲୋକେ ଗୁହାରି କରିଥିଲେ । ଶୁଖିଲା ପ୍ରତିଶ୍ରୁତିକୁ ଛାଡି ଦେଲେ ଆଉ କିଛି ମିଳିନଥିଲା । ‘ବଡ଼ ଖବର’ରେ ଖବର ପ୍ରସାରଣ ପରେ ପ୍ରଶାସନର ନଜର ପଡ଼ିଛି । ଗାଁକୁ ଯାଇ ସ୍ଥିତି ପରଖିବା ପରେ ଆରଡବ୍ଲ୍ୟୁଏସଏସ ଅଧିକାରୀଙ୍କ ନିର୍ଦ୍ଦେଶରେ ନଳକୂଅ ମରାମତି ହୋଇଛି । ଏବେ ନଳକୂଅରୁ ଲୋକେ ବିଶୁଦ୍ଧ ପାଣି ନେଉଛନ୍ତି । ପାଣି ପାଇଁ ଆଉ କାହାରିକୁ କେନାଲକୁ ଯିବାକୁ ପଡୁନାହିଁ । ଯେଉଁ କାମ ଦୀର୍ଘ ବର୍ଷଧରି ହେଉନଥିଲା ଗୋଟିଏ ନ୍ୟୁଜ୍ରେ ସମସ୍ୟା ସୁଧୁରି ଯାଇଥିବାରୁ ଲୋକେ ‘ବଡ଼ ଖବର’କୁ ଧନ୍ୟବାଦ ଜଣାଇଛନ୍ତି । ‘ବଡ଼ ଖବର’ ଲାଗି ଏହା ସମ୍ଭବ ହେଲା ବୋଲି ଲୋକେ କହୁଛନ୍ତି ।
