ଅସରାଏ ବର୍ଷାରେ ଭାସିଲା ରାଜଧାନୀ ଦିଲ୍ଲୀ

ଭୁବନେଶ୍ୱର (ବଡ଼ ଖବର ବ୍ୟୁରୋ): ପ୍ରବଳ ବର୍ଷା ପରେ ପାଣିରେ ଭାସୁଛି ରାଜଧାନୀ ଦିଲ୍ଲୀ । ରାସ୍ତାରେ ଗାଡି ଯିବା ତ ଦୂରର କଥା ଚାଲି ଚାଲି ଗଲେ ବି ଆଣ୍ଠୁଏ ଉଚ୍ଚର ପାଣି ଦେଇ ଯିବାକୁ ପଡୁଛି । ରାସ୍ତା ଉପରେ ଚାଲିଛି ନାଳପାଣି। ରାସ୍ତାରେ ଫସିଛନ୍ତି ଶହ ଶହ ଯାନବାହନ ଓ ଯାତ୍ରୀ। ସ୍ଥିତି ଏପରି ହୋଇଛି ଯେ ଅନେକ ବସ ଅଧାବୁଡିବା ଅବସ୍ଥାରେ ରହିଛି।

କିଛି ସ୍ଥାନରେ ଆମ୍ବୁଲାନ୍ସ ଫସିବା ବି ଦେଖାଯାଇଛି। ଗତ ଦୁଇ ମାସର ପ୍ରବଳ ଗ୍ରୀଷ୍ମ ଜ୍ବାଳା ପରେ ଏବେ ବର୍ଷା ତାଣ୍ଡବ ଦିଲ୍ଲୀବାସୀଙ୍କୁ ହରକତ କରିଛି। ଅନେକ ଅଞ୍ଚଳରେ ଲୋକେ ଘରୁ ପଦାକୁ ଆସିବା ଅସମ୍ଭବ ହୋଇପଡିଲାଣି । ଗତ ୨୪ ଘଣ୍ଟା ମଧ୍ୟରେ ଦିଲ୍ଲୀର ୨୨୮ ମିଲିମିଟର ବର୍ଷା ହୋଇଥିବା ସୂଚନା ମିଳିଛି। ସେହିପରି ହରିଆଣାରେ ମଧ୍ୟ ପ୍ରବଳ ବର୍ଷା ହୋଇଛି। ଶହ ଶହ ଯାନବାହନ ରାସ୍ତାରେ ଅଟକି ରହିଛନ୍ତି। ଲକ୍ଷାଧିକ ଲୋକ ଜଳଘେରରେ ରହିଛନ୍ତି।