ଯୁଦ୍ଧ ଶେଷ କରିବେ କି ଟ୍ରମ୍ପ?
ନୂଆଦିଲ୍ଲୀ (ବଡ଼ ଖବର ବ୍ୟୁରୋ): ମଧ୍ୟପ୍ରାଚ୍ୟରେ ଚାଲିଥିବା ସଂଘର୍ଷ ମଧ୍ୟରେ, ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଗୁରୁବାର ଜାତି ଉଦ୍ଦେଶ୍ୟରେ ଏକ ଭାଷଣ ଦେଇଛନ୍ତି। ଟ୍ରମ୍ପ ସ୍ପଷ୍ଟ ଭାବରେ କହିଛନ୍ତି ଯୁଦ୍ଧ ଏପର୍ଯ୍ୟନ୍ତ ଶେଷ ହୋଇନାହିଁ । ଅପରେଶନ ଏପିକ ଫ୍ୟୁରି ଜାରି ରହିଛି। ଆଗାମୀ ଦୁଇରୁ ତିନି ସପ୍ତାହ ମଧ୍ୟରେ ଏକ କଠୋର ଆଭିମୁଖ୍ୟ ଗ୍ରହଣ କରାଯିବ । ଏହା ସହିତ ଇରାନ ଭିତରେ ପ୍ରମୁଖ ଉଦ୍ଦେଶ୍ୟଗୁଡ଼ିକ ଶେଷ ହେବାକୁ ଯାଉଛି। ଆମେରିକୀୟ ସେନା ‘ଅପରେଶନ ଏପିକ ଫ୍ୟୁରି’ ଆରମ୍ଭ କରିବାର ମାତ୍ର ଗୋଟିଏ ମାସ ହୋଇଛି। ଗତ ଚାରି ସପ୍ତାହ ମଧ୍ୟରେ ଆମର ସୈନ୍ୟମାନେ ଯୁଦ୍ଧକ୍ଷେତ୍ରରେ ନିର୍ଣ୍ଣାୟକ ଏବଂ ବିପୁଳ ବିଜୟ ହାସଲ କରିଛନ୍ତି।
ଏପରି ବିଜୟ ଯାହା ପୂର୍ବରୁ କ୍ୱଚିତ୍ ଦେଖାଯାଇଥିଲା। ତାଙ୍କ ଅଭିଭାଷଣରେ ଟ୍ରମ୍ପ ଘୋଷଣା କରିଛନ୍ତି, ଆମେ ଆମର ଉଦ୍ଦେଶ୍ୟ ହାସଲ କରିବା ପାଇଁ ଅଭିଯାନ ଜାରି ରଖିବୁ। ଆମେରିକା ତା’ର ସମସ୍ତ ଲକ୍ଷ୍ୟକୁ ଦ୍ରୁତ ଗତିରେ ହାସଲ କରିବା ପାଇଁ ପଥରେ ଅଛି। ଆସନ୍ତା ଦୁଇରୁ ତିନି ସପ୍ତାହ ମଧ୍ୟରେ ଆମେ ସେମାନଙ୍କୁ କଡ଼ା ଆକ୍ରମଣ କରିବାକୁ ଯାଉଛୁ। ଆମେ ସେମାନଙ୍କୁ ପ୍ରସ୍ତର ଯୁଗକୁ ଫେରାଇ ଦେବୁ, ଯେଉଁଠାରେ ସେମାନେ ବାସ୍ତବରେ ଥିଲେ। ସେ ଇରାନକୁ ଏକ କଠୋର ଚେତାବନୀ ଦେଇ କହିଛନ୍ତି, ଯଦି କୌଣସି ଚୁକ୍ତି ନ ହୁଏ, ତେବେ ସେମାନଙ୍କର ପାୱାର ପ୍ଲାଣ୍ଟଗୁଡ଼ିକୁ ଟାର୍ଗେଟ କରାଯିବ। ଯଦି ସେମାନେ ଆଲୋଚନା କରିବାକୁ ଅନିଚ୍ଛୁକ ରୁହନ୍ତି, ତେବେ ଆମେ ସେମାନଙ୍କର ସମସ୍ତ ପାୱାର ଉତ୍ପାଦନ ସୁବିଧା ଉପରେ ଏକ ବଡ଼ ଆକ୍ରମଣ କରିବୁ।
ସେ କହିଛନ୍ତି ମଧ୍ୟପ୍ରାଚ୍ୟ ଯୁଦ୍ଧରେ ଇରାନ ଭୟଙ୍କର କ୍ଷତି ସହିଛି । ଆତଙ୍କବାଦକୁ ଇରାନର ପୂର୍ଣ୍ଣ ସମର୍ଥନ ରହିଛି । ଆମର ସମସ୍ତ ଟାର୍ଗେଟ ପୂରଣ ହୋଇସାରିଛି । ଇରାନ୍ର ସବୁ ନେତାଙ୍କୁ ଆମେ ମାରି ସାରିଛୁ । ଇରାନର ନୌସେନାକୁ ଆମେରିକୀୟ ସେନା କଡ଼ା ଜବାବ ଦେଇଛନ୍ତି । ଇରାନ୍ର ମିସାଇଲ୍ ଓ ଡ୍ରୋନ୍ ଶେଷ ହୋଇସାରିଛି । ଆମ ଭଳି ଦେଶ ସାରା ବିଶ୍ୱରେ ନାହିଁ । ଆମେରିକାର ସୁରକ୍ଷା ପାଇଁ ଆକ୍ରମଣ ଜରୁରୀ ଥିଲା, ବିଜୟ ହୋଇସାରିଛି । ଏବେ ଫେରିବାର ବେଳ ଆସିଛି । ଅପରେସନ୍’ଏପିକ୍ ଫ୍ୟୁରୀ’ ଜାରି ରହିବ । ସେନାର ଲକ୍ଷ୍ୟ ହାସଲ ପରେ ଯୁଦ୍ଧରେ ପୂର୍ଣ୍ଣଛେଦ ପଡ଼ିବ । ଇରାନ୍ ନିଜେ ନିଜର ୪୫ ହଜାର ନାଗରିକଙ୍କୁ ମାରିଛି । ସାରା ବିଶ୍ୱରେ ଆମେରିକା ପାଖରେ ଅଧିକ ଗ୍ୟାସ୍ ରହିଛି । ଋଷ୍ ଅପେକ୍ଷା ଅଧିକ ତେଲ ଉତ୍ପାଦନ କରୁଛି ଆମେରିକା ।