ଗର୍ଭବତୀ ମହିଳାଙ୍କୁ ଉଦ୍ଧାର କରିବାକୁ ଯାଇ ନଦୀରେ ଓଲଟିଲା ବୋଟ
ଗଞ୍ଜାମ (ବଡ଼ ଖବର ବ୍ୟୁରୋ): ଗର୍ଭବତୀ ମହିଳାଙ୍କୁ ଉଦ୍ଧାର କରିବାକୁ ଯାଇ ନଦୀରେ ଓଲଟିଲା ବୋଟ । ଗଞ୍ଜାମ ଭଞ୍ଜନଗର ବ୍ଲକ ବାଇବାଲି ପଞ୍ଚାୟତ ଉପାନ୍ତ ତଡମା ଗାଁରେ ଗର୍ଭବତୀ ମହିଳାଙ୍କୁ ଉଦ୍ଧାର କରିବାକୁ ଯାଇ ନଦୀରେ ଓଲଟିଲା ଅଗ୍ନିଶମ ବାହିନୀର ବୋଟ । ସୂଚନା ଅନୁଯାୟୀ, ନଦୀ ସେପଟ ଗାଁରେ ଗର୍ଭବତୀ ମହିଳା ଆରତୀ ଗୌଡ଼ କନ୍ୟା ସନ୍ତାନକୁ ଜନ୍ମ ଦେଇଛନ୍ତି । ନଦୀର ପ୍ରଖର ସ୍ରୋତରେ ବୋଟ ଦୁର୍ଘଟଣା ଯୋଗୁଁ ଗର୍ଭବତୀଙ୍କ ପାଖରେ ଭଞ୍ଜନଗର ବ୍ଲକ ପ୍ରଶାସନ ପହଂଚି ପାରିଲେ ନାହିଁ ।
ବର୍ତ୍ତମାନ ଭଗବାନଙ୍କ ଭରସାରେ ମହିଳା ଜଣଙ୍କ ନଦୀ ଆରପଟ ଗାଁରେ ରହିଛନ୍ତି । ବର୍ଷା ଯୋଗୁଁ ଉପାନ୍ତ ତଡ଼ମା ଗାଁକୁ ଲାଗି ଏକ ଜଙ୍ଗଲୀ ନଦୀ ବୋହି ଯାଇଛି । ଆଜି ସକାଳେ ମହିଳାଙ୍କୁ ପ୍ରସବ ଯନ୍ତ୍ରଣା ଆସିବାରୁ ଭଞ୍ଜନଗର ପ୍ରଶାସନକୁ ଖବର ଦେଇଥିଲେ ପରିବାର ଲୋକେ । ଭଞ୍ଜନଗର ଓ ବେଲଗୁଣ୍ଠା ଉଭୟ ଅଗ୍ନୀଶମ ବାହିନୀ ଙ୍କୁ ସାଙ୍ଗରେ ନେଇ ଭଞ୍ଜନଗର ବିଡିଓ ଓ ସିଡିପିଓ ଟିମ୍ ସହିତ ଗାଁ ମୁଣ୍ଡରେ ପହଂଚିଥିଲେ । ସେଠାରେ ଗର୍ଭବତୀଙ୍କୁ ଉଦ୍ଧାର କରିବା ପାଇଁ ବହୁ ଚେଷ୍ଟା କରିଥିଲେ କିନ୍ତୁ ନଦୀର ପ୍ରଖର ପାଣିରେ ବୋଟ ଟି ଓଲଟି ପଡିବାରୁ ଉଦ୍ଧାର କରିପାରି ନ ଥିଲେ । ବୋଟ ଓଲଟିଲା ପରେ ମଧ୍ୟ ଅଗ୍ନିଶମ କର୍ମଚାରୀ ସୁରକ୍ଷିତ ଉଦ୍ଧାର ହୋଇଛନ୍ତି ।