ମଠ ପରିଚାଳନାରେ ଅନିୟମିତତା ଅଭିଯୋଗ

ଜଗତସିଂହପୁର (ବଡ଼ ଖବର ବ୍ୟୁରୋ): ଜଗତସିଂହପୁର ବ୍ଲକ ଅନ୍ତର୍ଗତ ବଳରାମପୁର ପଞ୍ଚାୟତର ଦେନ୍ଦୁଅ ଗ୍ରାମରେ ଥିବା ଗୁଣ୍ଡୁଚି ଗୋସ୍ୱାମୀ ମଠ ପରିଚାଳନାରେ ବ୍ୟାପକ ଅନିୟମିତତା ହେଉଥିବା ଅଭିଯୋଗ ହୋଇଛି। ଏହି ମଠ ଦେବୋତ୍ତର ବିଭାଗ ଅଧୀନରେ । ମଠ ଦାୟିତ୍ୱରେ ଥିବା ଗଣେଶ୍ୱର ମଲ୍ଲ ମଠର ବଡ଼ ବଡ଼ ଗଛଗୁଡ଼ିକୁ ମାଫିଆଙ୍କୁ ବିକ୍ରି କରି ଅର୍ଥ ଆତ୍ମସାତ କରୁଥିବା ଅଭିଯୋଗ ହୋଇଛି। ଦେବୋତ୍ତର ବିଭାଗ ଅନୁମତି ନ ଥାଇ ଗଛଗୁଡ଼ିକ ବିକ୍ରି କରିବାକୁ ନେଇ ସ୍ଥାନୀୟ ତହସିଲଦାର କୌଣସି ପଦକ୍ଷେପ ଗ୍ରହଣ କରୁନାହାନ୍ତି। ଗୁଣ୍ଡୁଚି ଗୋସ୍ୱାମୀ ଠାକୁରଙ୍କର ଏକର ଏକର ସମ୍ପତ୍ତିରୁ ଆୟ ହେଉଥିବା ଅର୍ଥର ମଧ୍ୟ ସଠିକ ହିସାବ ମିଳୁନାହିଁ। ଫଳରେ ଦେବୋତ୍ତର ବିଭାଗର ବ୍ୟାପକ ଅର୍ଥ ବାଟମାରଣା ହେଉଥିବା ଅଭିଯୋଗ ହେଉଛି। ସ୍ଥାନୀୟ ତହସିଲଦାର ଓ ଦେବୋତ୍ତର ବିଭାଗ ଏହାର ତଦନ୍ତ କରିବାକୁ ଗ୍ରାମବାସୀ ଦାବି କରିଛନ୍ତି।