ଜୁଆର ପାଣିରେ ଭାସିଯାଇ ୩ବର୍ଷର ଶିଶୁ ମୃତ

ଭଦ୍ରକ(ବଡ଼ ଖବର ବ୍ୟୁରୋ): ଜୁଆର ପାଣିରେ ଭାସିଯାଇ ୩ ବର୍ଷ ଶିଶୁର ମୃତ୍ୟୁ। ଏଭଳି ଅଭାବନୀୟ ଘଟଣା ଭଦ୍ରକ ଜିଲା ଚାନ୍ଦବାଲି ବ୍ଲକ ଚଡଦିଆ ପଞ୍ଚାୟତ ରାଜରାଜେଶ୍ୱରପଲ୍ଲୀ ଗାଁରେ ଘଟିଛି । ମୃତ ଶିଶୁ ଜଣକ ହେଲେ ହରିପଦ ବିଜୁଳିଙ୍କ ୩ ବର୍ଷର ଝିଅ ଶୁଭଶ୍ରୀ । ବାତ୍ୟା ୟାଶ ଯୋଗୁ ରାଜରାଜେଶ୍ୱରପଲ୍ଲୀ ଗାଁ ଭିତରକୁ ପଶି ଆସିଥିଲା ଜୁଆର ପାଣି । ଗାଁକୁ ଜୁଆର ପାଣି ଘେରି ରହିଛି । ଏପରିକି ଲୋକଙ୍କ ଘର ଦୁଆର ମୁହଁରେ ପାଣି ଜମି ରହିଛି ।

ଗାଁ ରାସ୍ତାରେ ୩ ଫୁଟରୁ ୪ ଫୁଟର ପାଣି ଜମି ରହିଛି । ହରିପଦ ଓ ତାଙ୍କ ସ୍ତ୍ରୀ ଘର କାମରେ ବ୍ୟସ୍ତ ଥିବା ବେଳେ ହଠାତ ୩ ବର୍ଷର ଶିଶୁ ଶୁଭଶ୍ରୀ ପାଣିରେ ପଡି ଭାସିଯାଇଥିଲେ । ସଙ୍ଗେ ସଙ୍ଗେ ବାପା ଓ ମା’ ଝିଅକୁ ଉଦ୍ଧାର କରିଥିଲେ । ଗୁରୁତର ଅବସ୍ଥାରେ ଲୋକମାନେ ତାଙ୍କୁ ଚାନ୍ଦବାଲି ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଛନ୍ତି ।