୨୧ରେ ସର୍ବ ଦଳୀୟ ବୈଠକ

ନୂଆଦିଲ୍ଲୀ (ବଡ଼ ଖବର ବ୍ୟୁରୋ): ଆସନ୍ତା ୨୨ ତାରିଖରୁ ଆରମ୍ଭ ହେବ ସଂସଦର ବଜେଟ ଅଧିବେଶନ । ଏହା ଅଗଷ୍ଟ ୧୨ ତାରିଖ ପର୍ଯ୍ୟନ୍ତ ଚାଲିବ । ଅଧିବେଶନ ଅବ୍ୟବହିତ ପୂର୍ବରୁ ଆସନ୍ତା ୨୧ ତାରିଖରେ ସଂସଦୀୟ ବ୍ୟାପାର ମନ୍ତ୍ରୀ କିରେନ ରିଜିଜୁ ଏକ ସର୍ବଦଳୀୟ ବୈଠକ ଡାକିଛନ୍ତି। ବୈଠକରେ ଯୋଗଦେବା ଲାଗି ବିଭିନ୍ନ ରାଜନୈତିକ ଦଳର ଗୃହର ନେତାମାନଙ୍କୁ ଡକାଯାଇଛି । ସଂସଦର ଆନେକ୍ସ ରୁମରେ ମୁଖ୍ୟ କମିଟି ପ୍ରକୋଷ୍ଠରେ ସକାଳ ୯ଟାରେ ଏହି ବୈଠକ ଅନୁଷ୍ଠିତ ହେବ ।

ସର୍ବଦଳୀୟ ବୈଠକରେ ବଜେଟ ଅଧିବେଶନକୁ ସୁରୁଖୁରୁରେ ସମ୍ପାଦନ କରିବା ଲାଗି ସରକାରଙ୍କ ପକ୍ଷରୁ ସବୁ ଦଳର ସହଯୋଗ ଲୋଡାଯିବ । ସାଧାରଣତଃ କୌଣସି ଅଧିବେଶନ ଆରମ୍ଭ ହେବା ପୂର୍ବରୁ ସରକାରଙ୍କ ପକ୍ଷରୁ ସର୍ବଦଳୀୟ ବୈଠକ ଡକାଯାଇଥାଏ । ଆସନ୍ତା ୨୩ ତାରିଖରେ କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ ମୋଦି ସରକାରଙ୍କ ତୃତୀୟ ପାଳିର ପ୍ରଥମ ବଜେଟ ଉପସ୍ଥାପନ କରିବେ।