ସାଲେପୁର (ବଡ଼ ଖବର ବ୍ୟୁରୋ): ଅଦ୍ୟମ ଇଚ୍ଛାଶକ୍ତି ଓ କଠିନ ପରିଶ୍ରମ ମଣିଷକୁ ଶିଖରରେ ପହଞ୍ଚାଇଥାଏ। ପେସାରେ ଆଇଟି ସଫ୍ଟୱୟାର ଇଞ୍ଜିନିୟର ନିଶା କିନ୍ତୁ ଅଲଗା। ନିଶାରେ ଜଣେ ସଫଳ ବଂଶୀ କାରିଗର। ବଂଶୀ ତିଆରି କରିବା କୌଶଳ ପାଇଁ ସେ କøଣସି ତାଲିମ ନେଇ ନାହାନ୍ତି। ନିଜେ ଏଥିପାଇଁ କଠିନ ପରିଶ୍ରମ କରି ନିଜକୁ ଏକ ସଫଳ ବଂଶୀ କାରିଗର ରୂପେ ଆନ୍ତର୍ଜାତିକ ସ୍ତରରେ ପରିଚୟ ସୃଷ୍ଟି କରିପାରିଛନ୍ତି। ରୋଜଗାର ପାଇଁ ନୁହେଁ ବରଂ ନିଜର ନା କମାଇବା ପାଇଁ ଏଭଳି କଳାକୁ ସେ ଆପଣେଇ ନେଇଛନ୍ତି।
ଏଥିପାଇଁ ତାଙ୍କୁ ନିଜର ପରିବାରର ସହଯୋଗ ମିଳିଥିବା ସେ କହିଛନ୍ତି। ଏଭଳି ଜଣେ ଯୁବ ବଂଶୀ କାରିଗର ହେଲେ କଟକ ଜିଲ୍ଲା ସାଲେପୁର ବ୍ଳକ ନନ୍ଦୋଳ ଗାଁର ସତ୍ୟବ୍ରତ ସାହୁ। ଆଇଟି ସଫ୍ଟୱୟାର ଇଞ୍ଜିନିୟର। କିନ୍ତୁ ଏବେ ସେ ଗାଁ ମୁହାଁ। ବଂଶୀର ଯାଦୁ ଏବେ ତାଙ୍କୁ କରିଦେଇଛି ଗାଁ ମୁହାଁ। ଏବେ ସେ ନିଜକୁ ଜଣେ ସଫଳ ବଂଶୀ କାରିଗର ରୂପେ ପରିଚୟ ସୃଷ୍ଟି କରିପାରିଛନ୍ତି ଦେଶବିଦେଶରେ।ସେ ଏବେଯେ ଖାଲି ବଂଶୀ ତିଆରି କରନ୍ତି ତାହା ନୁହେଁ ବଂଶୀ ବଜାଇବାରେ ମଧ୍ୟ ମାହିର।
ଏବେ ତାଙ୍କ ହାତ ତିଆରି ବଂଶୀ କିଣିବାପାଇଁ ବଂଶୀବାଦକମାନେ ଅନଲାଇନ ଓ ଅଫ ଲାଇନ କରୁଛନ୍ତି ଅର୍ଡର। ଦେଶରେ ତାଙ୍କ ହାତ ତିଆରି ବଂଶୀର ଚାହିଦା ଅଛି ତାହା ନୁହେଁ ବାହାର ଦେଶ କାନାଡ଼ା, ୟୁଏସ, ଅଷ୍ଟ୍ରେଲିଆ, ମାଲେସିଆ,ଥାଇଲାଣ୍ଡ, ସ୍ପେନ, ଓମାନ ଓ ଦୁବାଇ ଭଳି ଦେଶରେ ଚାହିଦା ଥିବା ଦେଖାଦେଇଛି । ତାଙ୍କ ରେଷ୍ଟ ଅଫ ଦ ଲାଇଫ ସେ ବଂଶୀକୁ ନେଇ କଟାଇବେ ବୋଲି ସୂଚନା ଦେଇଛନ୍ତି। ଏନେଇ ସେ ଗ୍ରାମରେ ଏକ ମ୍ୟୁଜିକାଲ ସ୍କୁଲ ଖୋଲି ଗ୍ରାମୀଣ କଳାକୁ ଲୋକଲୋଚନକୁ ଆଣିବେ ବୋଲି ଆଶା ରଖିଛନ୍ତି।
ଏସବୁ କାମପାଇଁ ନିଜର ସହଧର୍ମିଣୀ ତାଙ୍କୁ ସାହାଯ୍ୟ ଓ ସହଯୋଗର ହାତ ବଢାଇବା ସହ ରାତିରାତି ଲାଗି ନିଜର ସ୍ୱାମୀଙ୍କ ସହ ମିଶି ବଂଶୀ ତିଆରି କାମରେ ଲାଗିଥାନ୍ତି। ଆଉ ସ୍ୱାମୀଙ୍କ ଏଭଳି କଳା ପାଇଁ ସେ ବହୁତ ଖୁସି ଥିବା ସହ ଆଗାମୀ ଦିନରେ ବିଶ୍ୱ ଦରବାରରେ ସେ କିଭଳି ପ୍ରତିଷ୍ଠା ଲାଭ କରିବେ ତାହା ତାଙ୍କର ଲକ୍ଷ୍ୟ ବୋଲି କହିଛନ୍ତି।
