ଆଜି ମହାପ୍ରଭୁଙ୍କ ଓଷ ଲାଗି ନୀତି

ପୁରୀ(ବଡ଼ ଖବର ବ୍ୟୁରୋ): ଜ୍ୱରରେ ପୀଡ଼ିତ ଦାରୁବ୍ରହ୍ମ । ଶ୍ରୀମନ୍ଦିର ଅଣସର ପିଣ୍ଡିରେ ଚାଲିଛି ଶ୍ରୀବିଗ୍ରହଙ୍କ ଗୁପ୍ତ ସେବା । ଉପଶମ ପାଇଁ ଦିନରାତି ଏକ କରିଛନ୍ତି ଦଇତାପତି ସେବକ । ଶ୍ରୀଅଙ୍ଗ ଖୋଲିବା ପରେ ଫୁଲରି ତେଲ ଲାଗି କରାଯାଇଛି । ଗୁରୁବାର ବଡ଼ ଓଡ଼ିଆ ମଠରୁ ଶ୍ରୀମନ୍ଦିରକୁ ଫୁଲରି ତେଲ ବିଜେ ହୋଇଛି । ରାତିରେ ଠାକୁରଙ୍କ ପାଦପଦ୍ମରେ ଫୁଲରି ତେଲ ଘଷା ପରେ ଉପଶମ ଲଭିଛନ୍ତି ଶ୍ରୀବିଗ୍ରହ । ଅନବସରର ଷଷ୍ଠୀ ଅବସରରେ ଆଜି ମହାପ୍ରଭୁଙ୍କୁ ଓଷ ବା ଔଷଧ ଲାଗି କରାଯିବ। ଏହା ଆସନ୍ତା ୩ ଦିନ ଧରି ଚାଲିବ। ଜ୍ୱରରୁ ମୁକ୍ତି ପାଇଁ ଶ୍ରୀବିଗ୍ରହଙ୍କ ଶ୍ରୀଅଙ୍ଗରେ ଫୁଲରି ତୈଳ ମର୍ଦ୍ଦନ କରାଯାଏ । ଏହି ତେଲ ମାଲିସ ପରେ ଶ୍ରୀଜିଉ କିଛି ଅଂଶରେ ସୁସ୍ଥ ହୋଇଥାନ୍ତି ବୋଲି ବିଶ୍ୱାସ ରହିଛି ।

ତିନୋଟି ତିନି ସେରିଆ ମାଟି ଘଡ଼ିରେ ଘଣା ପେଡ଼ା ରାଶି ତେଲ ସହିତ କୃଷ୍ଣଭାଗ ଧାନ, ବେଣା ଚେର, ଚନ୍ଦନ କାଠ, କେତକୀ, ଚମ୍ପା, ବଉଳ, ମାଳତୀ, ମଲ୍ଲୀ, ଜୁଇ, ଜାଇ ଆଦି ଫୁଲର ମିଶ୍ରଣ, ଶାଳ ପର୍ଣ୍ଣି, ଗମ୍ଭାରୀ, ଲବାଙ୍ଗ କୁଳି, ଫଣଫଣା, କୃଷ୍ଣ ପର୍ଣ୍ଣି, ବେଲ, ଖଣି ବଥୁ, ପଟଳି, ଖୁଆ, ଅଙ୍କରାନ୍ତି, ଗୋଖରା, ଲମ୍ବାଗୋତି, ଦେଶୀ ଘିଅ, ମହୁ, ନବାତ, ଖୁଆସର ଆଦିକୁ ମିଶାଇ ଏକ ବର୍ଷ ପର୍ୟ୍ୟନ୍ତ ମାଟି ତଳେ ପୋତା ଯାଏ । ଦୀର୍ଘ ଏକ ବର୍ଷ କାଳ ରଖି ଦେବସ୍ନାନ ପୂର୍ଣ୍ଣିମା ଦିନ ମାଟି ତଳୁ ବାହାରି ପ୍ରସ୍ତୁତ ହୁଏ । ଏହି ଅବଧିରେ ମିଶ୍ରିତ ତୈଳ ଔଷଧରେ ରୁପାନ୍ତରିତ ହୋଇଥାଏ ।