ସେନା ହେଲିକପ୍ଟର ଦୁର୍ଘଟଣା, ୨ ପାଇଲଟ ମୃତ
ନୂଆଦିଲ୍ଲୀ (ବଡ଼ ଖବର ବ୍ୟୁରୋ): ଅରୁଣାଚଳ ପ୍ରଦେଶରେ ସେନା ହେଲିକପ୍ଟର ଦୁର୍ଘଟଣା, ୨ ପାଇଲଟ ମୃତ । ଗୁରୁବାର ଆରୁଣାଚଳ ପ୍ରଦେଶରେ ସେନାର ଚିତା ହେଲିକପ୍ଟର ଦୁର୍ଘଟଣାରେ ଦୁଇଜଣ ପାଇଲଟଙ୍କ ମୃତ୍ୟୁ ହୋଇଛି। ମୃତ ପାଇଲଟ ହେଲେ ଲେଫ୍ଟନାଣ୍ଟ କର୍ଣ୍ଣେଲ ଭିଭିବି ରେଡ୍ଡି ଓ ମେଜର ଜୟନ୍ତ ଏ । ହେଲିକପ୍ଟରଟି ଆସାମର ସୋନିତପୁର ଜିଲ୍ଲା ଅଧୀନ ମିସାମାରିରୁ ଅରୁଣାଚଳ ପ୍ରଦେଶର ତୱାଙ୍ଗକୁ ଏକ ଅପରେସନରେ ଉଡ଼ାଣ କରିଥିଲା। ମିସାମାରିକୁ ଫେରିବା ସମୟରେ ପାଗ ଖରାପ ହେବାରୁ ହେଲିକପ୍ଟରଟି ଦୁର୍ଘଟଣାଗ୍ରସ୍ତ ହୋଇଥିଲା ।
ସକାଳ ୯ଟା ୧୫ରେ ଚିତା ହେଲିକପ୍ଟର ଏୟାର ଟ୍ରାଫିକ୍ କଣ୍ଟ୍ରୋଲ (ଏଟିସି) ସହିତ ଯୋଗାଯୋଗ ବିଚ୍ଛିନ୍ନ ହୋଇଥିଲା ବୋଲି ଗୌହାଟିସ୍ଥିତ ପ୍ରତିରକ୍ଷା ବିଭାଗର ପ୍ରବକ୍ତା ଲେଫ୍ଟନାଣ୍ଟ କର୍ଣ୍ଣେଲ ମହେନ୍ଦ୍ର ରାୱତ ସୂଚନା ଦେଇଥିଲେ। ଅରୁଣାଚଳ ପ୍ରଦେଶ ପୋଲିସ ସୂଚନା ଅନୁଯାୟୀ, ଦିରଙ୍ଗ ଥାନା ଅଧୀନ ବଙ୍ଗଜଲେପ ଠାରେ ଗ୍ରାମବାସୀମାନେ ମଧ୍ୟାହ୍ନରେ ଦୁର୍ଘଟଣାଗ୍ରସ୍ତ ହେଲିକପ୍ଟରକୁ ଦେଖିଥିଲେ। ସେହି ସମୟରେ ହେଲିକପ୍ଟର ଜଳୁଥିଲା। ଘଟଣାସ୍ଥଳରେ ସଶସ୍ତ୍ର ସୀମା ବଳ ଏବଂ ଆଇଟିବିପିର ୫ଟି ଦଳ ଖୋଜିବା ଆରମ୍ଭ କରିଥିଲେ। ତେବେ ଦୁର୍ଘଟଣାର କାରଣ ଜାଣିବା ପାଇଁ ସେନା ପକ୍ଷରୁ ତଦନ୍ତ ନିର୍ଦ୍ଦେଶ ଦିଆଯାଇଛି।
