ଶୁଣିଲାନି ପ୍ରଶାସନ, ଚାନ୍ଦାକରି ରାସ୍ତା ମରାମତି କଲେ ଗ୍ରାମବାସୀ

ବାଲିଗୁଡା (ବଡ଼ ଖବୀ ବ୍ୟୁରୋ): କନ୍ଧମାଳ ଜିଲ୍ଲା କ.ନୂଆଗାଁ ବ୍ଲକ ବଣ୍ଡଗୁଡା  ପଞ୍ଚାୟତ କଙ୍ଗେରିକିଆ ଗାଁକୁ ଆଜି ପର୍ଯ୍ୟନ୍ତ ଗମନାଗମନ ପାଇଁ ରାସ୍ତାଟିଏ ମଧ୍ୟ ନିର୍ମାଣ ହୋଇପାରିଲା ନାହିଁ। ପଞ୍ଚାୟତ କାର୍ଯ୍ୟାଳୟ ଠାରୁ ଆରମ୍ଭ କରି ଜିଲ୍ଲାପାଳ,ବିଧାୟକ ପର୍ଯ୍ୟନ୍ତ ରାସ୍ତା ନିର୍ମାଣ ପାଇଁ ଦାବି କରି ଆସୁଥିଲେ ମଧ୍ୟ ସରକାରଙ୍କ ତରଫରୁ କୈାଣସି ସୁବିଧା ମିଳିଲା ନାହିଁ । ଯାହା ଫଳରେ ବର୍ଷା ଦିନେ ଆସିଲେ ଗମନାଗମନ ପାଇଁ ଜରୁରୀକାଳୀନ ସେବାରୁ ବହୁତ ଅସୁବିଧାର ସମ୍ମୁଖୀନ ହେଉଥିବା ଯୋଗୁଁ କଙ୍ଗେରିକିଆ ଗ୍ରାମବାସୀ ଏକତ୍ରିତ ହୋଇ ଚାନ୍ଦା କରି ରାସ୍ତା ମରାମତି କରିଛନ୍ତି।

ପାଖାପାଖି ୪୫ ରୁ ଅଧିକ ପରିବାର ଏହି କଙ୍ଗେରିକିଆରେ ବସବାସ କରନ୍ତି । ଅଙ୍ଗନୱାଡ଼ି କେନ୍ଦ୍ର, ପ୍ରାଥମିକ ବିଦ୍ୟାଳୟ , ଆରୋଗ୍ୟ କେନ୍ଦ୍ର ଏହି ଗ୍ରାମରେ ଥିବା ବେଳେ ରାସ୍ତା ନଥିବାରୁ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ରାସ୍ତା ମରାମତି ପାଇଁ ଗ୍ରାମବାସୀ ପ୍ରଶାସନ ଠାରୁ ଆରମ୍ଭ କରି ନିର୍ବାଚିତ ପ୍ରତିନିଧିଙ୍କ ନିକଟରେ ଅଭିଯୋଗ କରିଥିଲେ ମଧ୍ୟ କୌଣସି ଫଳପ୍ରଦ ହୋଇନଥିଲା। ଶେଷରେ ନିଜ କାମକୁ ନିଜେ କରିବା ପାଇଁ ନିଷ୍ପତ୍ତି ନେଇ ପ୍ରତି ଘରୁ ଚାନ୍ଦା ଆଦାୟ କରି କଙ୍ଗେରିକିଆ ଠାରୁ ଘାଟି ପର୍ଯ୍ୟନ୍ତ ରାସ୍ତା ମରାମତି କରିଛନ୍ତି।

ନୂତନ ରାଜ୍ୟ ସରକାରଙ୍କ ଉପରେ ଭରସା କରି ଗ୍ରାମବାସୀ ନିବେଦନ କରିଛନ୍ତି ଯେ ଆଗାମୀ ଦିନରେ ଗ୍ରାମକୁ ଏକ ପକ୍କା ରାସ୍ତା ନିର୍ମାଣ କରିବା ପାଇଁ। ଗାଁର ଯୁବକ ଠାରୁ ଆରମ୍ଭ କରି ବୟସ୍କ ପର୍ଯ୍ୟନ୍ତ ସମସ୍ତେ ଅନୁରୋଧ କରିଛନ୍ତି। ଅଞ୍ଚଳବାସୀ ବାରମ୍ବାର ଅଭିଯୋଗ କରିଲେ ମଧ୍ୟ କୌଣସି ସୁଫଳ ମିଳିନଥିଲା। ଦୁଇ ବର୍ଷ ପୂର୍ବେ କନ୍ଧମାଳ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଧାରଣା ଦେଇଥିଲେ ଏବଂ ଗତ ପଞ୍ଚାୟତ ନିର୍ବାଚନ ମଧ୍ୟ ବର୍ଜନ କରିଥିଲେ। ହେଲେ ଆଜି ପର୍ଯ୍ୟାୟ ଫଳ ଶୂନ। ବର୍ତମାନ ନୂତନ ସରକାର ଏହା ପ୍ରତି ଦୃଷ୍ଟି ଆକର୍ଷଣ କରିବା ପାଇଁ ଅନୁରୋଧ କରିଛନ୍ତି।