ବିଜେଡିରେ ମିଶିଲେ ବାବୁଲା ମଲ୍ଲିକ
ଭୁବନେଶ୍ୱର (ବଡ଼ ଖବର ବ୍ୟୁରୋ): ବିଜେଡିରେ ମିଶିଲେ ଭାଗିରଥୀ ମଲ୍ଲିକ । ଶତାଧିକ କର୍ମକର୍ତ୍ତାଙ୍କୁ ନେଇ ଶଙ୍ଖ ଭବନରେ ବିଜୁ ଜନତା ଦଳରେ ସାମିଲ ହୋଇଛନ୍ତି । ମୁଖ୍ୟମନ୍ତ୍ରୀଙ୍କ ବିକାଶମୂଳକ କାର୍ଯ୍ୟକୁ ପ୍ରଶଂସା କରିଛନ୍ତି । ୨୦୩୬ ପାଇଁ ନବୀନ ପଟ୍ଟନାୟକ ଦେଖିଥିବା ଓଡ଼ିଶାର ସ୍ୱପ୍ନରେ ଅନୁପ୍ରାଣିତ ହୋଇ ଦଳରେ ମିଶିଥିବା କହିଛନ୍ତି ବାବୁଲା । ମୁଖ୍ୟମନ୍ତ୍ରୀଙ୍କ ଆଦର୍ଶ, ସାଂସଦ ଅତୁ୍ୟତ ସାମନ୍ତ ଓ ବିଧାୟକ ମହିଧର ରଣାଙ୍କ କାର୍ଯ୍ୟରେ ପ୍ରଭାବିତ ହୋଇଛି ।
ଏହାରି ଭିତରେ କଥା ଛଳରେ କଣ୍ଟାମାଳ ବିଜେପି ବିଧାୟକ ପ୍ରାର୍ଥୀଙ୍କୁ ପେସାଦାର ଅପରାଧି କହିବାକୁ ପଛେଇ ନାହାନ୍ତି । ନିର୍ବାଚନ ସମୟରେ ଭୋଟର ଉଚିତ ଜବାବ ଦେବେ କହିଛନ୍ତି । ଭାଗିରଥୀ ହେଉଛନ୍ତି ବୌଦ୍ଧ ବ୍ଲକର ପୂର୍ବତନ ଅଧ୍ୟକ୍ଷ ସ୍ୱର୍ଗତ ରାମଚନ୍ଦ୍ର ମଲ୍ଲିକଙ୍କ ପୁଅ । ପେସାରେ ବାବୁଲା ଜଣେ ଓକିଲ । ସେପଟେ ଦଳରେ ମିଶିଥିବା ଦାମୋଦର ମିଶ୍ର କହିଛନ୍ତି ଯେ ଦୀର୍ଘ ୨୫ ବର୍ଷ ହେଲା ରାଜ୍ୟକୁ ବିକାଶ ପଥରେ ଆଗେଇ ନେଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ତାଙ୍କ ବିକାଶଧାରା ଲୋକଙ୍କୁ ଆକର୍ଷିତ କରିଛି ।
ଏହି ମିଶ୍ରଣ ପର୍ବରେ ରାଜ୍ୟସଭା ସାଂସଦ ସସ୍ମିତ ପାତ୍ର, କନ୍ଧମାଳ ସାଂସଦ ଅତୁ୍ୟତ ସାମନ୍ତ, କଂଟାମାଳ ବିଧାୟକ ମହିଧର ରଣା, ପର୍ଯ୍ୟବେକ୍ଷକ ଅମରେଶ ଜେନା ପ୍ରମୁଖ ଉପସ୍ଥିତ ଥିଲେ । ଦଳରେ ଯୋଗ ଦେଇଥିବା ବ୍ୟକ୍ତି ହେଲେ ଆଶିଷ ଘିବେଲା, ନିରଞ୍ଜନ ଦେହୁରୀ, ଶଙ୍କର ସେଠୀ, ସଞ୍ଜୟ କମ୍ପ, ଅଭିମନୁ୍ୟ ନାୟକ, ପିଣ୍ଟୁ ମେହେର ଭଳି ୨ଶହରୁ ଅଧିକ ନେତା-କର୍ମକର୍ତ୍ତା । ଶେଷରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ, ସଙ୍ଗଠନ ସଂପାଦକ ପ୍ରଣବ ପ୍ରକାଶ ଦାସଙ୍କ ପକ୍ଷରୁ ସମସ୍ତଙ୍କୁ ଧନ୍ୟବାଦ ଜଣାଇଛନ୍ତି ରାଜ୍ୟସଭା ସାଂସଦ ସସ୍ମିତ ପାତ୍ର ।