ନୂଆଦିଲ୍ଲୀ(ବଡ଼ ଖବର ବ୍ୟୁରୋ): ଆସନ୍ତା ଲୋକସଭା ନିର୍ବାଚନରେ ଆରଜେଡି ସହ କୌଣସି ଆସନ ବାଣ୍ଟିବ ନାହିଁ କଂଗ୍ରେସ। ବିହାରର କଂଗ୍ରେସ ପ୍ରଭାରୀ ଭକ୍ତ ଚରଣ ଦାସ ମହାଗଠବନ୍ଧନ ଆସନ ଭାଗବଣ୍ଟାରେ ପୂଣ୍ଣଚ୍ଛେଦ ପକାଇଛନ୍ତି। ଗଣମାଧ୍ୟମକୁ ପ୍ରତିକ୍ରିୟା ଦେଇ ଭକ୍ତ କହିଛନ୍ତି ଯେ ଦଳ ଏକୁଟିଆ ଉପ-ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବ। ତେଣୁ ବିହାରରେ ବିରୋଧୀ ଦଳର ମହାଗଠବନ୍ଧନର ଆବଶ୍ୟକତା ନାହିଁ। କଂଗ୍ରେସ ଆଉ ରାଷ୍ଟ୍ରୀୟ ଜନତା ଦଳ (ଆରଜେଡି) ସହିତ ନାହିଁ। କଂଗ୍ରେସ ବିନା ଗଠବନ୍ଧନରେ ନିଜେ ନିର୍ବାଚନ ଲଢ଼ିବ। ତେବେ ଏହାକୁ କାଉଣ୍ଟର କରି ଆରଜେଡି କହିଛି ଯେ ତୃଣମୂଳ ସ୍ତରର କାମ କରିବାର ଅଭିଜ୍ଞତା କଂଗ୍ରେସ ପାଖରେ ନାହିଁ ।
ବିହାରରେ କଂଗ୍ରେସ ଏବଂ ଆରଜେଡିର ମିଳିତ ଗଠବନ୍ଧନ ଗତ ତିନି ଦଶନ୍ଧି ଧରି ଚାଲିଆସୁଛି। ଯଦିଓ ମଝିରେ ମଝିରେ ଉଭୟଙ୍କ ମଧ୍ୟରେ ବିଛେଦ ହୋଇଥିଲା, ତଥାପି ପରେ ଦୁହେଁ ଏକାଠି ହୋଇଥିଲେ | ତେବେ ବିହାରର ଦୁଇଟି ବିଧାନସଭା ଆସନ ତାରାପୁର ଏବଂ କୁଶେଶ୍ୱରସ୍ତାନରେ ହେବାକୁ ଥିବା ଉପ-ନିର୍ବାଚନକୁ ନେଇ ଦୁଇ ଦଳ ମଧ୍ୟରେ ତିକ୍ତତା ଦେଖାଦେଇଛି। ତିକ୍ତତା ଏତେ ଉଗ୍ରରୂପ ନେଇଛି ଯେ ତିନି ଦଶନ୍ଧି ଗଠବନ୍ଧନ ଭାଙ୍ଗିବାକୁ ଯାଉଛି। ରାଷ୍ଟ୍ରୀୟ ଜନତା ଦଳ ଉଭୟ ସ୍ଥାନରୁ ନିଜର ପ୍ରାର୍ଥୀ ଦେଇଥିବାବେଳେ କଂଗ୍ରେସ ମଧ୍ୟ ନିଜ ପ୍ରାର୍ଥୀଙ୍କ ନାମ ଘୋଷଣା କରିଛି | ଏହାରି ଭିତରେ ଉପ-ନିର୍ବାଚନରେ ଜନ ଅଧିକାର ପାର୍ଟି ମୁଖ୍ୟ ପପୁ ଯାଦବ କଂଗ୍ରେସକୁ ସମର୍ଥନ ଜଣାଇଛନ୍ତି। ପାଟନାରେ ସେ ଭକ୍ତ ଚରଣ ଦାସଙ୍କୁ ଭେଟିଥିଲେ। ଏହି ବୈଠକ ପରେ ଭକ୍ତ ଚରଣ ଦାସ କହିଛନ୍ତି ଯେ ପପୁ ଯାଦବଙ୍କ ସମର୍ଥନରେ ନିର୍ବାଚନରେ କଂଗ୍ରେସକୁ ଶକ୍ତି ମିଳିବ।
