୩ ମାସ ପରେ ଖୋଲିଲା ଭିତରକନିକା, ଖୁସି ହେଲେ ପର୍ଯ୍ୟଟକ

କେନ୍ଦ୍ରାପଡ଼ା(ବଡ଼ ଖବର ବ୍ୟୁରୋ): ଦୀର୍ଘ ତିନିମାସ ପରେ ଖୋଲିଲା ଭିତରକନିକା । ଆଜିଠୁ ଦେଶ ବିଦେଶର ପର୍ଯ୍ୟଟକଙ୍କ ପାଇଁ ଖୋଲିଛି ଭିତରକନିକା । ଏହାକୁ ନେଇ ପର୍ଯ୍ୟଟକଙ୍କ ମଧ୍ୟରେ ଉତ୍ସାହ ଭରି ରହିଛି । କୁମ୍ଭୀର ପ୍ରଜନନ କାର୍ୟ୍ୟ ଚାଲୁ ରହିଥିବାରୁ ମେ – ୧ ରୁ ଜୁଲାଇ -୩୧ ପର୍ୟ୍ୟନ୍ତ ଜାତୀୟ ଉଦ୍ୟାନ ଭିତରକନିକା ବନ୍ଦ ରହିଥିଲା। ଅଗଷ୍ଟ ପହିଲାରେ ଭିତରକନିକା ଜାତୀୟ ଉଦ୍ୟାନ ଖୋଲିବା ପରେ ପର୍ୟ୍ୟଟକଙ୍କ ଭିଡ ଜମିଛି । ପର୍ୟ୍ୟଟକମାନେ ଭିତରକନିକା ମଧ୍ୟକୁ ପ୍ରବେଶ କରିବାକୁ ହେଲେ ପରିଚୟପତ୍ରକୁ ବାଧ୍ୟତା ମୂଳକ କରାଯାଇଛି । ପର୍ୟ୍ୟଟକଙ୍କୁ ସ୍ୱାଗତ ପାଇଁ ବନ ବିଭାଗ ପକ୍ଷରୁ ଭିତରକନିକାର ମୁଖ୍ୟ ଗେଟ ଖୋଲାଯାଇଥିବା ବେଳେ ଖୋଳା, ଗୁପ୍ତି ଓ ଚାନ୍ଦବାଲିର ୩ଟି ବୋଟିଂ ପଏଣ୍ଟରେ ବ୍ୟାପକ ବ୍ୟବସ୍ଥା କରାଯାଇଥିଲା। ଭିତରକନିକାରେ ପର୍ଯ୍ୟଟକମାନେ ଜଳପଥରେ ବଉଳା କୁମ୍ଭୀର, ଦେଶୀ ଓ ବିଦେଶୀ ପକ୍ଷୀ, ହରିଣ, ବାରହା, ସମ୍ବର, ଝିଙ୍କ ଆଦି ନାନା ପଶୁ ପକ୍ଷୀ ଓ ମ୍ୟୁଜିୟମ ଦେଖିବା ସହ ବନବିଭାଗ ପକ୍ଷରୁ ନିର୍ମାଣ ହୋଇଥିବା ଦେଶର ପ୍ରଥମ ମ୍ୟାନଗ୍ରୋଭ ନର୍ସରୀ, ବୋଟ ଲାଇବ୍ରେରୀ, ସ୍କାଏ ୱାଲ୍କ ,କୁମ୍ଭୀର ପ୍ରଜନନ କେନ୍ଦ୍ର ଆଦି ଦେଖିପାରିବେ । ସେପଟେ ଗୁପ୍ତି ବୋଟିଂ ପୋଏଣ୍ଟରେ ପାରମ୍ପରିକ ଅନୁଯାଇ ପର୍ୟ୍ୟଟକମାନଙ୍କୁ ପୁଷ୍ପ ଗୁଚ୍ଛ ଓ ଚକଲେଟ ଦେଇ ବନବିଭାଗ ଭିତରକନିକାକୁ ସ୍ୱାଗତ କରିବା ସହିତ କୁମ୍ଭୀରମାନଙ୍କ ଠାରୁ କିଭଳି ସୁରକ୍ଷିତ ରହି ଭିତରକନିକାକୁ ଉପଭୋଗ କରିବେ ସେ ନେଇ ପର୍ୟ୍ୟଟକଙ୍କୁ ସଚେତନ କରାଯାଇଥିଲା ।