ଚାନ୍ଦବାଲିକୁ ସବ୍ ଡିଭିଜନ ମାନ୍ୟତା ଦାବି, ତହସିଲ ଅଫିସ କାର୍ଯ୍ୟାଳୟ ସମ୍ମୁଖରେ ବିଜେପିର ଧାରଣା

ଚାନ୍ଦବାଲି  (ବଡ଼ ଖବର ବ୍ୟୁରୋ): ଚାନ୍ଦବାଲିକୁ ସଵ୍ ଡିଭିଜନ ମାନ୍ୟତା ଦାବି । ଏଯାହାକୁ ନେଇ ବିଜେପି ଯୁବ ମୋର୍ଚ୍ଚା ପକ୍ଷରୁ ଏକ ବାଇକ୍ ରାଲି କରାଯାଇଛି । ବିଜେପି କର୍ମୀମାନେ ଚାନ୍ଦବାଲି ସହର ପରିକ୍ରମା କରି ତହସିଲ ଅଫିସ ସମ୍ମୁଖରେ ପ୍ରତିବାଦ ସହ ତହସିଲଦାରଙ୍କ ମାଧ୍ୟମରେ ରାଜ୍ୟପାଳଙ୍କୁ ଦାବିପତ୍ର ପ୍ରଦାନ କରିଛନ୍ତି। ଦୀର୍ଘ ୬ ବର୍ଷ ହେଲା ଚାନ୍ଦବାଲିଵାସୀ ଏହି ଦାବି କରି ଆସୁଥିଲେ ମଧ୍ୟ ଏପର୍ଯ୍ୟନ୍ତ କିଛି କାର୍ଯାନୁଷ୍ଠାନ ନିଆଯାଇନାହିଁ । ଚାନ୍ଦବାଲିରୁ ଭଦ୍ରକ ପର୍ଯ୍ୟନ୍ତ ଦୂରତା ୫୨ କିମି ଥିବାବେଳେ ଅଫିସର ଏବଂ ଉଚ୍ଚ ପଦସ୍ଥ କର୍ମଚାରୀମାନେ ଚାନ୍ଦବାଲିକୁ ପହଞ୍ଚିବା ସମ୍ଭବ ହୋଇ ପାରୁନାହିଁ । ସେପଟେ ଚାନ୍ଦବାଲିକୁ ସବ୍ ଡିଭିଜନ ମାନ୍ୟତା ମିଳିଲେ ସରକାରଙ୍କର ସବୁଠୁ କମ୍ ଖର୍ଚ୍ଚରେ ସବ ଡିଭିଜନ ଅଫିସ ହୋଇ ପାରିବ ବୋଲି ଦାବି କରିଛନ୍ତି ଅଂଚଳବାସୀ। ଯଦି ସାଧାରଣ ନିର୍ବାଚନ ପୂର୍ବରୁ ଚାନ୍ଦବାଲିକୁ ସବ ଡିଭିଜନ ଭାବେ ମାନ୍ୟତା ନ ମିଳେ ତେବେ ଆଗାମୀ ଦିନରେ ବିଜେପି ଆନ୍ଦୋଳନ କରିବ ବୋଲି ଚେତାବନୀ ଦେଇଛନ୍ତି।