ବିଶାଲ ମେଗାମାର୍ଟ ସିଲ୍

ଭୁବନେଶ୍ୱର (ବଡ଼ ଖବର ବ୍ୟୁରୋ): ରାଜ୍ୟରେ କରୋନା ସଂକ୍ରମଣ ଦିନକୁ ଦିନ ବଢିବାରେ ଲାଗିଛି । ଭୁବନେଶ୍ୱରରେ ହୁ ହୁ ହୋଇ ସଂକ୍ରମଣ ବଢୁଛି। ଏହାକୁ ଦୃଷ୍ଟିରେ ରଖି ବିଏମସି ସଜାଗ ହୋଇଉଠିଛି । ବିଏମସର ଏନଫୋର୍ସମେଣ୍ଟ ସ୍କ୍ୱାର୍ଡ ମାର୍କେଟ ବିଲ୍ଡିଂରେ ଜୋରଦାର ଚେକିଂ କରିବା ସହ ବିଭିନ୍ନ ମଲ ଉପରେ କଡା କାର୍ଯ୍ୟାନୁଷ୍ଠାନ ନେଇଛନ୍ତି । କୋଭିଡ ନିୟମ ଉଲ୍ଲଙ୍ଘନ କରିଥିବା ହେତୁ ମାର୍କେଟ ବିଲ୍ଡିଂ ଅଞ୍ଚଳରେ ଥିବା ବିଶାଲ ମେଗାମାର୍ଟକୁ ସିଲ କରିଦିଆଯାଇଛି ।

ସେଠାରେ ଭିଡ ଥିବା ଦେଖିବାକୁ ମିଳିଥିଲା । ଯାହାପରେ ବିଏମସି ଏହି ସୋ ରୁମକୁ ସିଲ୍ କରିଦେଇଛି । ଏହାସହ ବିଏମସିର ସ୍ୱତନ୍ତ୍ର ସ୍କ୍ୱାର୍ଡ କ୍ୱିନ୍ସ କଲେକ୍ସନ, କୋଲକାତା ବଜାର ଏବଂ ସିଟି ଫ୍ୟାସନକୁ ମଧ୍ୟ ଜରିମାନା କରିଛନ୍ତି । ଏହି ସବୁ ସୋ ରୁମରେ ଅଧିକ ଗହଳି ଥିବାରୁ ବିଏମସି ଏହି କାର୍ଯ୍ୟାନୁଷ୍ଠାନ ନେଇଛି। ଅନ୍ୟପଟେ ସଂକ୍ରମଣକୁ ଆଖି ଆଗରେ ରଖି ବିଏମସି ରାଜଧାନୀବାସୀଙ୍କ ପାଇଁ ନୂଆ ମାର୍ଗ ଦର୍ଶିକା ଜାରି କରିଛି । ଯେଉଁଥିରେ ବିବାହ କାମ ପାଇଁ କେବଳ ୧୦୦ ଲୋକ ଏବଂ ଅନ୍ତିମ କ୍ରିୟା ପାଇଁ କେବଳ ୫୦ ଲୋକ ଯୋଗ ଦେଇପାରିବେ ବୋଲି ବିଏମସି ନିର୍ଦ୍ଦେଶାନାମା ଜାରି କରିଛି ।