ପୋଖରୀରୁ ନାବାଳକ ମୃତଦେହ ଉଦ୍ଧାର

ଜଗନ୍ନାଥପ୍ରସାଦ (ବଡ଼ ଖବର ବ୍ୟୁରୋ): ପୋଖରୀରୁ ନାବାଳକ ମୃତଦେହ ଉଦ୍ଧାର । ହତ୍ୟା ଅଭିଯୋଗ ଆଣିଲେ ପରିବାର । ଗଞ୍ଜାମ ଜିଲ୍ଲ । ଜଗନ୍ନାଥପ୍ରସାଦ ବ୍ଲକ ଅଲାଡି ପଂଚାୟତର କାଦପୋଡ଼ା ଗ୍ରାମ ସନ୍ନିକଟ କାଜୁଜଙ୍ଗଲରେ ଥିବା ବେଣାଘାଇ ନୂଆବନ୍ଧ ପାଣିରୁ କାଦପୋଡା ବଡ଼ଦାଣ୍ଡ ସାହିର ଶିବରାମ ପଣ୍ଡାଙ୍କ ପୁଅ ବିଘ୍ନରାଜ ପଣ୍ଡାଙ୍କ ମୃତ ଦେହ ଉଦ୍ଧାର ହୋଇଛି । ବିଘ୍ନରାଜ ସକାଳେ ଟିଉସନରୁ ଫେରି ସାଇକେଲ ଚଳାଇ ଗାଁ ଦାଣ୍ଡରେ ବୁଲୁଥିଲା । ତେବେ ଘରକୁ ଆସିବାରେ ବିଳମ୍ବ ଯୋଗୁଁ ଶିବରାମ ଖୋଜା ଖୋଜି କରି ନିରାଶ ହୋଇଥିଲେ । ପରେ ବେଣାଘାଇ ନିକଟରେ ପୁଅର ସାଇକେଲ ଥିବା ଦେଖି ସନ୍ଦେହ ହେବାରୁ ଘାଇ ଭିତରକୁ ଯାଇ ଖୋଜିଥିଲେ । ପାଣି ଭିତରେ ତାଙ୍କ ଗୋଡ଼ରେ ପୁଅର ମୃତଦେହ ବାଜିଥିଲା । ତାକୁ ଟେକି କୂଳକୁ ଆଣିବା ପରେ ଗ୍ରାମ ଲୋକଙ୍କୁ ଖବର ଦେଇଥିଲେ । ଲୋକେ ପହଂଚି ସ୍ଥାନୀୟ ପୋଲିସକୁ ଖବର ଦେଇଥିଲେ । ପୋଲିସ ଶବ ଜବତ କରି ବ୍ୟବଛେଦ ପାଇଁ ଭଞ୍ଜନଗର ପଠାଇ ତଦନ୍ତ ଆରମ୍ଭ କରିଛି । ବିଘ୍ନରାଜକୁ ହତ୍ୟା କରାଯାଇଥିବା ସନ୍ଦେହ କରି ପରିବାର ଲୋକେଅଭିଯୋଗ କରିବାରୁ ପୋଲିସ ହତ୍ୟା ମାମଲା ରୁଜୁ କରିଛି ।