ନଜର ପକାନ୍ତୁ କେଉଁ ବିଭାଗକୁ କେତେ ଟଙ୍କା
ଭୁବନେଶ୍ୱର (ବଡ଼ ଖବର ବ୍ୟୁରୋ): ଡେ ୱାନରୁ ହଙ୍ଗାମା । ବାଚସ୍ପତିଙ୍କ ଚୌକିର ସମ୍ମୁଖ କାଚ ଭାଙ୍ଗିଲା । ବିରୋଧୀ ହଟ୍ଟଗୋଳ କଲେ, କଂଗ୍ରେସ ବିଧାୟକ ତାରାପ୍ରସାଦ ବାହିନୀପତିଙ୍କ ଚିରାଚରିତ ଆକ୍ସନ ବି ଦେଖିବାକୁ ମିଳିଲା । ଆଉ ଏସବୁ ଭିତରେ ଗୃହରେ ଚଳିତ ଆର୍ଥିକ ବର୍ଷ ପାଇଁ ଅତିରିକ୍ତ ବଜେଟ୍ ଆଗତ କରିଛନ୍ତି ଅର୍ଥମନ୍ତ୍ରୀ ନିରଞ୍ଜନ ପୂଜାରୀ ।
ଆଜିଠାରୁ ଆରମ୍ଭ ହୋଇଛି ଷୋଡ଼ଶ ବିଧାନସଭାର ପଞ୍ଚମ ଅଧିବେଶନ । ପ୍ରଥମ ଦିନରେ ୨୦୨୦-୨୧ ଆର୍ଥିକବର୍ଷ ପାଇଁ ଅତିରିକ୍ତ ବଜେଟ୍ ଉପସ୍ଥାପିତ ହୋଇଥିଲା । ବଜେଟରେ ମୋଟ୍ ବ୍ୟୟ ଅଟକଳ ୧୧ ହଜାର ୨୦୦ କୋଟି ଟଙ୍କା ପ୍ରସ୍ତାବ ରହିଛି । ମହାମାରୀକୁ ଆଖି ଆଗରେ ରଖି ଚଳିତ ବର୍ଷ ଅତିରିକ୍ତ ବଜେଟରେ ଆବଣ୍ଟନର ପୁନଃ ପ୍ରାଥମିକତା ଉପରେ ଗୁରୁତ୍ୱ ଦିଆଯାଇଛି ।
ପ୍ରଶାସନିକ ବ୍ୟୟ ବାବଦକୁ ୨ହଜାର ୨ଶହ ୭୩ କୋଟି , କାର୍ଯ୍ୟକ୍ରମ ବ୍ୟୟ ବାବଦକୁ ୭ହଜାର ୪ଶହ ୩୮ କୋଟି, ସ୍ୱାସ୍ଥ୍ୟ ଏବଂ ପରିବାର କଲ୍ୟାଣ ବିଭାଗକୁ ୧୭୬୮.୭୭ କୋଟି, ପଞ୍ଚାୟତିରାଜ ଓ ପାନୀୟ ଜଳ ବିଭାଗକୁ ୨୦୪୬.୧୧ କୋଟି, ଅର୍ଥ ବିଭାଗକୁ ସର୍ବାଧିକ ୨୩୬୩ କୋଟି, ବିପର୍ଯ୍ୟୟ ପରିଚାଳନା ପାଇଁ ୧୪୮୪.୨୨ କୋଟି, ଖାଦ୍ୟ ଯୋଗାଣ ବିଭାଗକୁ ୧୦୭୮.୦୩ କୋଟି, ଶକ୍ତି ବିଭାଗକୁ ୯୫୬.୮୦ କୋଟି ଓ ସ୍କୁଲ ଓ ଗଣଶିକ୍ଷା ବିଭାଗକୁ ୪୫୬.୫୦ କୋଟି ଟଙ୍କା ମଞ୍ଜୁର ହୋଇଛି ।