ରାୟଗଡ଼ା (ବଡ଼ ଖବର ବ୍ୟୁରୋ): ରାୟଗଡ଼ା ବିଜେଡିରେ ଗୋଷ୍ଠୀକନ୍ଦଳ । ଖଣ୍ଡ ଖଣ୍ଡ ହୋଇ ଫାଟିଯାଇଛି ୨୫ବର୍ଷର ଦଳ । ବିବାଦ ଏତେ ଦୂରରେ ପହଞ୍ଚଛି ଯେ ବିଜୁବାବୁଙ୍କ ଜୟନ୍ତୀ ନୁହେଁ, ନିଜ ନିଜ ଗୋଷ୍ଠୀର ଶକ୍ତି ପ୍ରଦର୍ଶନ । ଏନ ଭାସ୍କର ରାଓ କିଏ ଆମେ ଜାଣିନାହୁଁ ବୋଲି ଗୋଟିଏ ଗୋଷ୍ଠୀ କହୁଥିବା ବେଳେ ନବୀନ ପଟ୍ଟନାୟକଙ୍କ ହାତମୁଠା ନୁହେଁ, ଭାସ୍କର ରାଓଙ୍କ ହାତମୁଠାକୁ ଟାଣ କରନ୍ତୁ ବୋଲି ଅନ୍ୟ ଗୋଷ୍ଠୀ କହିବା ସମସ୍ତଙ୍କୁ ଚକିତ କରିଛି ।
ନବୀନ ପଟ୍ଟନାୟକଙ୍କ ହାତମୁଠାକୁ ଟାଣ କରନ୍ତୁ ନାହିଁ । ଆମେ ଯାହାକୁ ସର୍ବାଧିକ ଗୁରୁତ୍ୱ ଦେଇଆସିଛୁ, ସମସ୍ତଙ୍କର ପ୍ରୀୟ ନେତା ଭାସ୍କର ବାବୁଙ୍କ ହାତମୁଠାକୁ ଟାଣ କରନ୍ତୁ । ରାୟଗଡ଼ାର ଅଭିବୃଦ୍ଧି ପାଇଁ ଭାସ୍କର ବାବୁଙ୍କ ହାତମୁଠାକୁ ଟାଣ କରି ରାୟଗଡ଼ାକୁ ଆଗେଇ ନେବାପାଇଁ ଚେଷ୍ଟା କରନ୍ତୁ ବୋଲି ବିଜେଡି ରାଜ୍ୟ ସମ୍ପାଦକ ଜଗଦ୍ଦୀଶ ପାତ୍ର ତାଙ୍କ ଭାଷଣରେ କହିଥିଲେ ।
ରାୟଗଡ଼ା ନିର୍ବାଚନମଣ୍ଡଳୀରେ ଜଳ ଜଳ ହୋଇ ଦିଶୁଛି ବିଜେଡି ଫାଟ । ଗୋଟିଏ ପଟେ ପୂର୍ବତନ ରାଜ୍ୟସଭା ସାଂସଦ ଏନ.ଭାସ୍କର ରାଓ, ଅନ୍ୟପଟେ ବିଗତ ଦିନରେ ତାଙ୍କ ସୁରକ୍ଷା ପାଇଁ ଢ଼ାଲ ସାଜି୍ଥିବା ୟାଲା ଭେଙ୍କଟେସ୍ୱର ରାଓ ଓରଫ କଣ୍ଡାବାବୁ । ଭାସ୍କରଙ୍କ ସମାନ୍ତରାଳରେ ବିଜେଡି ବ୍ୟାନର ଓ ଶଙ୍ଖଚିହ୍ନ ତଳେ ଆଉଏକ ସଂଗଠନ ଚଳାଇଛନ୍ତି କଣ୍ଡାବାବୁ । ବିଜୁବାବୁଙ୍କ ଜୟନ୍ତୀ ପାଳନ ନୁହେଁ, ଉଭୟ ଗୋଷ୍ଠୀର ଶକ୍ତିପ୍ରଦର୍ଶନ ଦଳ ଭିତରେ ରହିଥିବା କନ୍ଦଳକୁ ପଦାରେ ପକାଇଦେଇଛି । କଣ୍ଡାବାବୁ ନିଜ ସମର୍ଥକଙ୍କ ସହ ରାୟଗଡ଼ା ସହରର ଶିରିଗଡ଼ାରୁ ପଟୁଆରରେ ବାହରି ବିଜୁବାବୁଙ୍କ ପ୍ରତିମୂର୍ତ୍ତିରେ ପୁଷ୍ପମାଲ୍ୟ ପକାଇ ପାଳିଥିଲେ ବିଜୁ ଜୟନ୍ତୀ ।
ଭାସ୍କର ରାଓ ବାଇକ୍ ରାଲିରେ ଆସି ଅଶୋକ କଲ୍ୟାଣ ମଣ୍ଡପରେ ପାଳିଥିଲେ ବିଜୁ ଜୟନ୍ତୀ । ଏହି ସଭାରେ ଭାସ୍କରଙ୍କ ସମର୍ଥକ ତଥା ବିଜେଡି ରାଜ୍ୟ ସମ୍ପାଦକ ଜଗଦ୍ଦୀଶ ପାତ୍ର ମଞ୍ଚରେ ନବୀନଙ୍କ ଗୁଣଗାଇଥିଲେ । ହଠାତ୍ ସ୍ୱର ପରିବର୍ତ୍ତନ କରି କହିଥିଲେ, ଭାସ୍କର ରାଓଙ୍କ ହାତମୁଠାକୁ ଟାଣ କରନ୍ତୁ । ନବୀନ ବାବୁଙ୍କର ନୁହେଁ । ବିଜେଡିରେ ଏତେ ବିଶୃଙ୍ଖଳା । ଦଳର ରାଜ୍ୟ ସମ୍ପାଦକ ଦଳର ସୁପ୍ରିମୋଙ୍କ ବିରୋଧରେ ଖୋଲାଖୋଲି ମନ୍ତବ୍ୟ ଦେବା କେତେଦୂର ସମିଚୀନ?
