ଭୁବନେଶ୍ୱର (ବଡ଼ ଖବର ବ୍ୟୁରୋ): ବଢୁଛି ବିଜେଡି ନେତାଙ୍କ ବିବାଦୀୟ ଚେହେରା । ପରୀ ହତ୍ୟାକାଣ୍ଡରେ ମନ୍ତ୍ରୀ ଅରୁଣ ସାହୁଙ୍କ ସମ୍ଫୃକ୍ତି । ମହାଙ୍ଗା ଡବଲ ମର୍ଡର ଘଟଣାରେ ଆଇନ ମନ୍ତ୍ରୀ ପ୍ରତାପ ଜେନାଙ୍କ ନାଁରେ ଏତଲା । ନଦୀବନ୍ଧ ଭାଙ୍ଗିବା ଘଟଣାରେ ଧର୍ମଶାଳା ବିଧାୟକ ପ୍ରଣବ ବଳବନ୍ତରାୟଙ୍କ ନାଁରେ ଭିଜିଲାନ୍ସ ତଦନ୍ତ । ଶେଷରେ ବଲାଙ୍ଗୀର ଯୁବ ବିଜେଡି ସଭାପତି ରାଜେନ୍ଦ୍ର ହୋତାଙ୍କ ବିରୋଧରେ ରହିଛି ଅପହରଣ ଅଭିଯୋଗ ।
ପ୍ରତାପଙ୍କୁ ଜେରା କେବେ? ପୋଲିସ କାହିଁକି ଆଇନମନ୍ତ୍ରୀ ପ୍ରତାପ ଜେନାଙ୍କୁ ପଚରାଉଚରା କରୁନାହିଁ? ଏତଲାରେ ପ୍ରତାପଙ୍କ ନାଁ ରହିଛି । ତେବେ କଟକ ଗ୍ରାମାଂଚଳ ପୋଲିସ କାହିଁକି ଆଇନମନ୍ତ୍ରୀଙ୍କ ଦେହରେ ହାତମାରି ପାରୁନି । ଆଇନ୍ ମନ୍ତ୍ରୀଙ୍କ ପାଇଁ ଆଇନ୍ ଅଲଗା ବାଟରେ ଯାଉଛି କି? ମାହାଙ୍ଗା ଡବଲ ମର୍ଡର ଘଟଣାକୁ ନେଇ ଏଭଳି କିଛି ପ୍ରଶ୍ନ ଉଠୁଛି । ଯାହା ବର୍ତ୍ତମାନ ଶାସନରେ ଥିବା ବିଜେଡିକୁ ଅକଳରେ ପକାଇଛି । ସେପଟେ ମାହାଙ୍ଗା ଡବଲ ମର୍ଡର ଘଟଣାରେ ପ୍ରତାପଙ୍କ ସମ୍ପୃକ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ମଧ୍ୟ ଚିନ୍ତା ବଢାଉଛି । ବିରୋଧୀ ଯେଭଳି ଭାବେ ଏହି ପ୍ରସଙ୍ଗକୁ ନେଇ ବିରୋଧ ପ୍ରଦର୍ଶନ କରୁଛନ୍ତି, ଆଗକୁ ପ୍ରତାପ ମନ୍ତ୍ରୀ ମଣ୍ଡଳରୁ ବିଦା ହୋଇପାରନ୍ତି ବୋଲି ଚର୍ଚ୍ଚା ହେଉଛି । ସେପଟେ ପ୍ରତାପ ମନ୍ତ୍ରୀପଦରୁ ଇସ୍ତଫା ନ ଦେବା ଯାଏ ତଦନ୍ତ ଠିକ ବାଟରେ ଆଗଇବ ନାହିଁ ବୋଲି ରାଜନୈତିକ ସମୀକ୍ଷକ ମତ ପ୍ରକାଶ କରୁଛନ୍ତି ।
ଅନ୍ୟପଟେ ଦିନକୁ ଦିନ ଶାସକ ବିଜୁ ଜନତା ଦଳ ପାଇଁ ବଢୁଛି ଅଡୁଆ । ପରୀ ଓ ମାହାଙ୍ଗା ଡବଲ ମର୍ଡର ଶାସକ ଦଳର ନେତାଙ୍କ ନାଁରେ ଆସିଛି ସଙ୍ଗୀନ ଅଭିଯୋଗ । କିଏ ବନ୍ଧ ଭାଙ୍ଗଲାଣି ତ, ଆଉ କାହା ନାଁରେ ଅପହରଣ ଅଭିଯୋଗ । ଧର୍ମଶାଳା ବିଜେଡି ବିଧାୟକ ପ୍ରଣବ ବଳବନ୍ତରାୟଙ୍କ ନାଁରେ ମାମୁ -ଭଣାଜା ଘାଇ ଭାଙ୍ଗିବା ଅଭିେଯୋଗ । ଲୋକାୟୁକ୍ତ ଏହା ଉପରେ ତଦନ୍ତ କରି ରିପୋର୍ଟ ଦେବାକୁ ଭିଜିଲାନ୍ସକୁ ନିର୍ଦ୍ଦେଶ ଦେଇଛି । ଯାହାକୁ ନେଇ ଏବେ ଅଡୁଆରେ ପ୍ରଣବ । ସେପଟେ ଆଦିବାସୀ ଯୁବକ ଶ୍ରୀକର ମିର୍ଦ୍ଦା ଅପହରଣ ଘଟଣାକୁ ନେଇ ବଲାଙ୍ଗୀର ରାଜନୀତି ଜୋର ଧରିଛି । ଜିଲ୍ଲାର ଯୁବ ବିଜେଡି ସଭାପତି ରାଜେନ୍ଦ୍ର ହୋତା ଅପହରଣ କରିଥିବା ଅଭିଯୋଗ ହୋଇଛି । ଯାହାକୁ ଗଣ୍ଠି କରିଛି କଂଗ୍ରେସ । ରାଜେନ୍ଦ୍ରଙ୍କୁ ତୁରନ୍ତ ଗିରଫ କରିବାକୁ ରାଜରାସ୍ତାକୁ ଓହ୍ଲାଇଛି ଦଳ । ଯାହାକୁ ନେଇ ଏବେ ଅକଳରେ ପଡିଛି ବିଜେଡି । ଜଣେ ଆଦିବାସୀ ଯୁବକ ଅପହରଣ ଘଟଣାରେ ବିଜେଡିର ଜିଲ୍ଲା ଯୁବ ସଭାପତିଙ୍କ ନାଁରେ ଅଭିଯୋଗ ଶାସକ ଦଳକୁ ଅଡୁଆରେ ପକାଇଛି ।
ଏସବୁ ଘଟଣାକୁ ନେଇ ହରଡଘଣାରେ ପଡିଛି ବିଜେଡି । ଦଳ ଉପରୁ ରାଜ୍ୟବାସୀ ଆସ୍ଥା ହରାଉଛନ୍ତି ।
