ଅକ୍ସଫୋର୍ଡ ଦ୍ୱାରା ପ୍ରସ୍ତୁତ ଟିକାକୁ ଲାଗିବ ଆହୁରି ୬ମାସ

ଭୁବନେଶ୍ୱର (ବଡ଼ ଖବର ବ୍ୟୁରୋ): ସାରା ବିଶ୍ୱ ଚାହିଁ ରହିଛି କରୋନା ଟିକାକୁ । ସମସ୍ତଙ୍କ ନଜର କେଉଁ ଦେଶ ପ୍ରଥମେ ଟିକା ବାହାର କରିବ । ଅକ୍ସଫୋର୍ଡ ବିଶ୍ୱବିଦ୍ୟାଳୟ ଓ ଫାର୍ମାସିଟ୍ୟୁକାଲ କମ୍ପାନୀ ଆଷ୍ଟ୍ରାଜେନେକା ଦ୍ୱାରା ପ୍ରସ୍ତୁତ ଟିକା ଆସନ୍ତା ୬ମାସ ମଧ୍ୟରେ ଆସିବ ବୋଲି ସୂଚନା ମିଳୁଛି । ବ୍ରିଟେନ ଟିକା ଓ ରୋଗ ପ୍ରତିରୋଧକ କମିଟିର ପ୍ରୋଟକଲ ଅନୁଯାୟୀ ୬୫ ବର୍ଷ ପର୍ଯ୍ୟନ୍ତ ପ୍ରତ୍ୟେକ ବର୍ଗର ବ୍ୟକ୍ତିଙ୍କ କ୍ଷେତ୍ରରେ ପ୍ରଯୁଜ୍ୟ ହେବ । ସେପ୍ଟେମ୍ବର ୨୧ ତାରିଖରୁ ପୁନେର ସେରମ ଇନଷ୍ଟୁଚ୍ୟୁଟ୍ ଭାରତରେ ତୃତୀୟ ପର୍ଯ୍ୟାୟ ଟିକା ପରୀକ୍ଷଣ ଆରମ୍ଭ କରିଛି । ପୁନେ ସାଲୁନ ଜେନେରାଲ ହସ୍ପିଟାଲରେ ମାନବ ପରୀକ୍ଷଣ ଆରମ୍ଭ କରାଯିବ ।
୧୫୦ରୁ ୨୦୦ଜଣଙ୍କ ଶରୀରରେ ଏହି ଟିକା ପରୀକ୍ଷଣ କରାଯିବ ବୋଲି ସେରମ୍ ଇନଷ୍ଟିଚ୍ୟୁଟ୍ ଅଫ୍ ଇଣ୍ଡିଆର କର୍ତ୍ତୃପକ୍ଷ ସୂଚନା ଦେଇଛନ୍ତି । ବ୍ରିଟେନରେ ଜଣେ ରୋଗୀଙ୍କ ଦେହରେ ପାର୍ଶ୍ୱ ପ୍ରତିକ୍ରିୟା ଦେଖାଯିବାରୁ ଏହା ବନ୍ଦ ଥିଲା । ଏମ୍ସ ନିଦ୍ଦେଶକ ଡକ୍ଟର ରଣଦୀପ ଗୁଲେରିଆ ଗଣମାଧ୍ୟମକୁ ସୂଚନା ଦେଇଛନ୍ତି ଯେ ପରୀକ୍ଷା ପରେ ଯଦି ଟିକା କାମ ଦିଏ ଆସନ୍ତା ଜାନୁଆରୀରେ ମାର୍କେଟରେ ଉପଲବ୍ଧ ହେବ ।