ମଧୁସୁଦନ ସେତୁ ତଳୁ ମହିଳା ଉଦ୍ଧାର ଘଟଣା: ଡେଇଁ ପଡ଼ିଲେ ନାଁ ଠେଲି ଦିଆଗଲା

ଟାଙ୍ଗୀ-ଚୌଦ୍ୱାର (ବଡ଼ ଖବର ବ୍ୟୁରୋ): ରବିବାର ଅପରାହ୍ନରେ କଟକ ମଧୁସୁଦନ ସେତୁ ତଳୁ ଜଣେ ମହିଳାଙ୍କୁ ଉଦ୍ଧାର କରିଛନ୍ତି ସ୍ଥାନୀୟ ଲୋକେ । ମହିଳା ଜଣକ ଆତ୍ମହତ୍ୟା କରୁଥିଲେ ନାଁ ତାଙ୍କୁ ଠେଲି ଦିଆଯାଇଥିଲା ତାହା ଏବେ ସନ୍ଦେହ ଘେରରେ ରହିଛି । ସଦ୍ୟ ସୂଚନା ମୁତାବକ ଉଦ୍ଧାର ହୋଇଥିବା ମହିଳା ଜଣକ ଓଲିଉଡର ଜଣେ ଜଣାଶୁଣା ଯୁବ ଅଭିନେତାଙ୍କ ସ୍ତ୍ରୀ ବୋଲି ଜଣାପଡ଼ିଛି ।

ପ୍ରତ୍ୟକ୍ଷଦର୍ଶୀଙ୍କ କହିବା ମୁତାବକ, ମହିଳା ଏବଂ ତାଙ୍କ ଅଭିନେତା ସ୍ୱାମୀ ଏକ ସ୍କର୍ପିଓ ଗାଡ଼ିରେ ଆସି ପୋଲ ଉପରେ ପ୍ରାୟ ୧୫ ମିନିଟ୍ ଠିଆ ହୋଇଥିଲେ । ପରେ ଉଭୟ ପୋଲର ପାଦଚଲା ରାସ୍ତାକୁ ଯାଇଥିଲେ । କିଛି ସମୟ ପରେ ମହିଳା ଜଣକ ବ୍ରିଜରୁ ତଳକୁ ଖସି ପଡ଼ିଥିଲେ । ତେବେ ସେ ନିଜେ ଡେଇଁ ପଡ଼ିଥିଲେ ନାଁ ତାଙ୍କୁ ଠେଲି ଦିଆଯାଇଥିଲା ତାହା ସ୍ପଷ୍ଠ ହୋଇନାହିଁ । ସୂଚନାଯୋଗ୍ୟ, ସମ୍ପୃକ୍ତ ଯୁବ ଅଭିନେତାଙ୍କ ବାପା ମଧ୍ୟ ଓଲିଉଡର ଜଣେ ଭେଟେରାନ ଅଭିନେତା । କିଛିବର୍ଷ ପୂର୍ବେ ଭେଟେରାନ ଅଭିନେତାଙ୍କ ସ୍ତ୍ରୀଙ୍କ ମୃତ୍ୟୁକୁ ନେଇ ମଧ୍ୟ ଚର୍ଚ୍ଚା ଜୋର ଧରିଥିଲା ।