କଲିକତା(ବଡ଼ ଖବର ବ୍ୟୁରୋ): ଫାଇନ୍ ଦେବେ ଦାଦା। ବିସିସିଆଇ ଅଧ୍ୟକ୍ଷ ସୌରଭ ଗାଙ୍ଗୁଲି ଫାଇନ ଦେବେ। ଗାଙ୍ଗୁଲିଙ୍କ ଉପରେ ଜରିମାନା ଲଗାଇଛନ୍ତି କଲିକତା ହାଇକୋର୍ଟ । ଜମି ଆବଣ୍ଟନକୁ ନେଇ ଏହି ଜରିମାନା ଲାଗିଛି। ଗାଙ୍ଗୁଲିଙ୍କ ସହ ପଶ୍ଚିମବଙ୍ଗ ସରକାର ଓ ନଗର ନିର୍ମାଣ ବିଭାଗ ଉପରେ ମଧ୍ୟ ଜରିମାନା ଲଗାଇଛନ୍ତି କୋର୍ଟ । ପୂର୍ବତନ ଭାରତୀୟ ଅଧିନାୟକ ଗାଙ୍ଗୁଲିଙ୍କୁ ଦଶ ହଜାର ଟଙ୍କାର ଫାଇନ ଲଗାଇଛନ୍ତି ହାଇକୋର୍ଟ । ସେହିପରି ପଶ୍ଚିମବଙ୍ଗ ସରକାରଙ୍କ ଉପରେ ୫୦ ହଜାର ଓ ନଗର ବିକାଶ ନିଗମ ଉପରେ ୩୦ ହଜାର ଟଙ୍କାର ଜରିମାନା ଲାଗିଛି ।
କଲିକତାର ନ୍ୟୁଟାଉନ ଅଞ୍ଚଳରେ ଗାଙ୍ଗୁଲି କୋଚିଂ ଦେବା ପାଇଁ ରାଜ୍ୟ ସରକାର ଜମି ଯୋଗାଇଥିଲେ । ଯାହା ଥିଲା ନିୟମ କାନୁନର ସମ୍ପୂଣ୍ଣ ବାହାରେ। ଯେଉଁଥିରେ ୨ ଏକର ଜମିକୁ ନେଇ ହାଇକୋର୍ଟରେ ପିଆଇଏଲ ଫାଇଲ ହୋଇଥିଲା। ୨୦୧୬ରେ କୋର୍ଟରେ ଆବେଦନ ହୋଇଥିବା ଜମି ଅନୀୟମିତତାର ଶୁଣାଣିକରି ଜଷ୍ଟିସ ରାଜେଶ ବିନ୍ଦଲ ଓ ଜଷ୍ଟିସ ଅରିଜିତ ବାନାର୍ଜୀଙ୍କ ଖଣ୍ଡପୀଠ ଏହି ରାୟ ଦେଇଛନ୍ତି। କୋର୍ଟ କହିଛନ୍ତି ଯେ, ଦେଶ ସଦାବେଳେ ଖେଳାଳିଙ୍କ ସହ ରହିଛି । ସୌରଭ ଗାଙ୍ଗୁଲି ଦେଶ ପାଇଁ ଗର୍ବ ଆଣିଛନ୍ତି। କିନ୍ତୁ ସମ୍ବିଧାନ ଆଗରେ ସମସ୍ତେ ସମାନ। କେହି ଏହାଠୁ ଉପରେ ନୁହେଁ ।
