ହାଡ଼ଫୁଟି ଭଳି ବ୍ୟାପିବ ଡେଲ୍ଟା ଭାରିଏଣ୍ଟ
ନୂଆଦିଲ୍ଲୀ (ବଡ଼ ଖବର ବ୍ୟୁରୋ): ଡେଲ୍ଟା ଭାରିଏଣ୍ଟକୁ ନେଇ ଭୟଙ୍କର ତଥ୍ୟ । ଅନ୍ୟ ସମସ୍ତ ଭାରିଏଣ୍ଟ ତୁଳନାରେ ଏହା ଅଧିକ ମାରାତ୍ମକ ରୋଗ ସୃଷ୍ଟି କରିପାରେ। ସେହିପରି ହାଡ଼ଫୁଟି ଭଳି ଏହା ସହଜରେ ସବୁଆଡ଼େ ବ୍ୟାପିବାର କ୍ଷମତା ବି ରହିଛି। ଆମେରିକାର ସ୍ୱାସ୍ଥ୍ୟ ଅଧିକାରୀଙ୍କ ଗୋଟିଏ ଅନ୍ତରୀଣ ରିପୋର୍ଟକୁ ଆଧାର କରି ଏପରି ଖବର ପ୍ରକାଶ ପାଇଛି। ରିପୋର୍ଟରେ କୁହାଯାଇଛି, ଟିକାର ଦୁଇଟି ଯାକ ଡୋଜ୍ ନେଇଥିବା ଲୋକମାନେ ମଧ୍ୟ ଟିକା ନେଇ ନଥିବା ଲୋକଙ୍କ ଭଳି ଡେଲ୍ଟା ଭାରିଏଣ୍ଟ ଦ୍ୱାରା ସଂକ୍ରମିତ ହୋଇପାରିବେ ।
ଏହାପରେ ସେମାନେ ଅନ୍ୟମାନଙ୍କୁ ଆକ୍ରାନ୍ତ ମଧ୍ୟ କରିପାରିବେ। ଏହି ଭାରିଏଣ୍ଟ ପ୍ରଥମଥର ପାଇଁ ଭାରତରେ ହିଁ ଚିହ୍ନଟ ହୋଇଥିଲା। ଡେଲ୍ଟା ଭାରିଏଣ୍ଟ ଅନ୍ୟ ମାରାତ୍ମକ ରୋଗ ସୃଷ୍ଟି କରିପାରେ ବୋଲି ଆଶଙ୍କା ପ୍ରକାଶ କରାଯାଇଛି। ଏଥିରେ କୁହାଯାଇଛି ଯେ ସାଧାରଣ ଥଣ୍ଡା ଓ ହାଡ଼ଫୁଟି ସୃଷ୍ଟି କରୁଥିବା ଭାଇରସ ତୁଳନାରେ ଡେଲ୍ଟା ଭାରିଏଣ୍ଟ ଜଣଙ୍କ ଠାରୁ ଆଉ ଜଣଙ୍କୁ ବ୍ୟାପିବାର କ୍ଷମତା ରଖିଛି। ସୂଚନା ଅନୁସାରେ, ଟିକା ନେଇଥିବା ଲୋକମାନେ ଟିକା ନେଇ ନଥିବା ଲୋକଙ୍କ ତୁଳନାରେ ଅଧିକ ସୁରକ୍ଷିତ।