ସ୍ଥାୟୀ ଡାକ୍ତର ନିଯୁକ୍ତି ଦାବିରେ ରାସ୍ତାରୋକ

ନରସିଂହପୁର (ବଡ଼ ଖବର ବ୍ୟୁରୋ): କଟକ ଜିଲ୍ଲା ନରସିଂହପୁର ବ୍ଲକ ଯୋଡ଼ୁମୁ ଡାକ୍ତରଖାନାରେ ସ୍ଥାୟୀ ଡାକ୍ତର ନିଯୁକ୍ତି ଦାବିରେ ରାସ୍ତା ଅବରୋଧ କରିଥିଲେ ସ୍ଥାନୀୟ ଲୋକେ । ନରସିଂହପୁର ବିଜେପି ୧୬ନଂ ଜୋନ ସଭାପତି ବିଜୟ କୁମାର ସୁବୁଦ୍ଧି ଓ ଜିଲ୍ଲା ପରିଷଦ ସଦସ୍ୟା ଜାହ୍ନବୀ ପ୍ରଧାନଙ୍କ ନେତୃତ୍ୱରେ ରେଗେଡ଼ା, ଯୋଡୁମୁ, ଜିଲିଣ୍ଡା ଆଦି ପଞ୍ଚାୟତର ଶତାଧିକ ଲୋକ ଜିଲିଣ୍ଡାଠାରେ ନରସିଂହପୁର-କମଳାଡିହ ମୁଖ୍ୟ ରାସ୍ତା ଅବରୋଧ କରିଥିଲେ। ସ୍ଥାନୀୟ ବିଜେପି ନେତା ବିଜୟ କୁମାର ଦଳବେହେରା ଘଟଣାସ୍ଥଳରେ ପହଞ୍ଚି ଆନ୍ଦୋଳନକୁ ସମର୍ଥନ କରିବା ସହ ଡାକ୍ତରଖାନାରେ ସ୍ଥାୟୀ ଡାକ୍ତର ନିଯୁକ୍ତି ଦାବି କରିଥିଲେ । ମେଡିକାଲ କ୍ୱାର୍ଟର୍ସ ଓ ବିଭିନ୍ନ ସମସ୍ୟା ପାଇଁ ସ୍ଥାନୀୟ ବିଧାୟକ ଦେବୀ ପ୍ରସାଦ ମିଶ୍ର ଓ ରାଜ୍ୟ ସରକାର ଦାୟୀ ବୋଲି ସେ କହିଥିଲେ । ଦାବି ପୂରଣ ନ ହେଲେ ଆଗାମୀ ଦିନରେ ବିଜେପିର ଆନ୍ଦୋଳନ ତୀବ୍ର ହେବ ବୋଲି ଚେତାବନୀ ଦେଇଛନ୍ତି ଦଳବେହେରା। ଅନ୍ୟପଟେ କାନପୁର ଡାକ୍ତରଖାନା ଅଧିକାରୀ ଡା. ଦେବାଶିଷ ଜେଠୀ ଆନ୍ଦୋଳନସ୍ଥଳରେ ପହଞ୍ଚି ସ୍ଥାୟୀ ଡାକ୍ତର ନିଯୁକ୍ତି ନ ହେବା ପର୍ଯ୍ୟନ୍ତ ସେ ନିଜେ ଯୋଡୁମୁରେ ରହି ଲୋକଙ୍କ ସେବା କରିବାକୁ ପ୍ରତିଶ୍ରୁତି ଦେବା ପରେ ଆନ୍ଦୋଳନ ହଟିଥିଲା।