ଖୋଲିଛି କାହ୍ନୁର ଗୁମର

ରଣପୁର (ବଡ଼ ଖବର ବ୍ୟୁରୋ): ହାଇପ୍ରୋଫାଇଲ ଠକ କାହ୍ନୁ ଚରଣ ପ୍ରଧାନ ଓରଫ କାହ୍ନୁ ଗିରଫ ହେବା ପରେ ତାଙ୍କ ଲିଙ୍କରେ ଥିବା ସହଯୋଗୀଙ୍କ ଗୁମର ଧୀରେ ଧୀରେ ଫିଟିବାରେ ଲାଗିଛି । ବୁଧବାର କାହ୍ନୁଙ୍କର ଜଣେ ଘେନିଷ୍ଟ ସହଯୋଗୀ ପର୍ଶୁରାମ ଜେନାକୁ ଗିରଫ କରିଛି ପୋଲିସ । ଖଣ୍ଡଗିରି ଅଞ୍ଚଳରୁ ତାଙ୍କୁ ଗିରଫ କରାଯାଇଛି । ପର୍ଶୁରାମ ନିକଟରୁ ନକଲି ଆଇକାର୍ଡ ସମେତ ଅନେକ ଗୁରୁତ୍ୱପୂର୍ଣ ସାମଗ୍ରୀ ମଧ୍ୟ ଜବତ କରାଯାଇଛି । ଗିରଫ ପର୍ଶୁରାମଙ୍କ ଘର ଖଣ୍ଡଗିରି ସାଇ କଲୋନୀରେ । କେନ୍ଦ୍ରାପଡା ଓ ଖୋର୍ଦ୍ଧା ଜିଲ୍ଲାରେ ସକ୍ରିୟ ରହି କାହ୍ନୁଙ୍କୁ ସେ ସହଯୋଗ କରିବା ସହ ଜମି କାରବାରରେ ସମ୍ପୃକ୍ତ ଥିଲେ । ଗୁରୁବାର କାହ୍ନୁଙ୍କ ବେଆଇନ ୫ଲକ୍ଷ ଟଙ୍କାକୁ ଜନୈକ ବ୍ୟକ୍ତିଙ୍କ ଠାରୁ ପୋଲିସ ଜବତ କରିଥିବା ଜଣାପଡ଼ିଛି । ଏ ସଂକ୍ରାନ୍ତରେ ଚାନ୍ଦପୁର ଥାନାରେ ଏକ ମାମଲା ରୁଜୁ ହୋଇଛି । ସୁରକ୍ଷା ଦୃଷ୍ଟିରୁ ଟଙ୍କା ଦେଇଥିବା ବ୍ୟକ୍ତିଙ୍କ ନାମଗୋପନ ରଖାଯାଇଛି । କାହ୍ନୁଙ୍କ ଲିଙ୍କରେ ଆଉ କେଉଁମାନେ ଅଛନ୍ତି ତା’ଉପରେ ପୋଲିସ ନଜର ରଖିଛି ।