ଭୁବନେଶ୍ୱର(ବଡ଼ ଖବର ବ୍ୟୁରୋ): ଜହ୍ନମାମୁଁ ପାଖେ ପହଂଚିଲା ପୃଥିବୀ ମା’ର ରାକ୍ଷୀ । ଚନ୍ଦ୍ରାୟନ-୩ର ସଫଳ ଲ୍ୟାଣ୍ଡିଂ କରିଛି ହିନ୍ଦୁସ୍ତାନ । ଆକାଶରେ ସୂର୍ଯ୍ୟ ଅସ୍ତ ଗଲେ, ଆଉ ସେପଟେ ଚନ୍ଦ୍ରପୃଷ୍ଠରେ ବିଜୟର ତ୍ରିରଙ୍ଗା ଉଡାଇଛି ଭାରତ । ମହୋତ୍ସବର ଏ ସମୟକୁ ଭିନ୍ନ ଭିନ୍ନ ସୃଜନଶୀଳତାରେ ପ୍ରକାଶ କରୁଛି ଦେଶ । ଠିକ୍ ଯେମିତି ଘୁରିବୁଲୁଛି ଗୋଟିଏ କଥା । ଆଗକୁ ଆସୁଛି ରାକ୍ଷୀ ପୂର୍ଣ୍ଣିମା । ଠିକ୍ ତାହା ପୂର୍ବରୁ ପୃଥିବୀରୁ ଯାଇ ଜହ୍ନରେ ପହଂଚିଛି ଚନ୍ଦ୍ରାୟନ ୩ । ପୃଥିବୀକୁ ଭାରତୀୟ ସଂସ୍କୃତିରେ ମା କୁହାଯାଏ ।
ଆଉ ଜହ୍ନକୁ ତ ଘରେ ଘରେ ମାମୁଁ ବୋଲି ଜାଣନ୍ତି । ଜହ୍ନକୁ ମାମୁଁ ସହ ତୁଳନା କରି କେତେ କଥା, କେତେ କାହାଣୀ । ଆ ଜହ୍ନ ମାମୁ ସରଗ ଶଶି, ମୋ କାହୁଁ ହାତେ ପଡରେ ଖସି । ଆଜି ସେହି ମାମୁଁ ପାଖେ ପହଂଚିସାରିଛି ଦେଶ । ସଂଯୋଗ ବି ଦେଖନ୍ତୁ, ରାକ୍ଷୀ ପୂର୍ଣ୍ଣିମାର ଠିକ୍ ପୂର୍ବରୁ ପହଂଚିସାରିଛି ଚନ୍ଦ୍ରଯାନ । ଯେମିତି ମାମୁଁ ପାଖେ ମା’ର ବାର୍ତା ସାଜି ଯାଇଛି ଚନ୍ଦ୍ରାୟନ । ମାମୁଁ ପାଖେ ମାର ରକ୍ଷାସୂତ୍ର ସାଜି ପହଂଚିଛି ଚନ୍ଦ୍ରାୟନ ।
