କୋଲକାତା (ବଡ଼ ଖବର ବ୍ୟୁରୋ): ପଶ୍ଚିମବଙ୍ଗରେ ଦୁଇଟି ନିର୍ବାଚନ ରାଲି ବାତିଲ କଲେ ଟିଏମସି ମୁଖ୍ୟ ମମତା ବାନାର୍ଜୀ । ଶନିବାର ପଶ୍ଚିମବଙ୍ଗର ଚତୁର୍ଥ ପର୍ଯ୍ୟାୟ ମତଦାନ ଚାଲିଥିବା ସମୟରେ ସୁରକ୍ଷାକର୍ମୀଙ୍କ ଗୁଳିରେ କୁଚବିହାରରେ ପ୍ରାଣ ହରାଇଥିଲେ ୪ଜଣ ଟିଏମସି କର୍ମୀ । ଏହାପରେ ଆଇନ ଶୃଙ୍ଖଳା ପରିସ୍ଥିତିକୁ ସାମ୍ନାରେ ରଖି ନିର୍ବାଚନ କମିଶନ ସେହି ଅଞ୍ଚଳକୁ ଅସନ୍ତା ୭୨ଘଣ୍ଟା ପାଇଁ ରାଜନେତାଙ୍କ ପ୍ରବେଶକୁ ନିଷେଧ କରିଥିଲେ ।
ତେବେ ଗୁଳିକାଣ୍ଡର ସମୀକ୍ଷା କରିବାକୁ ଚତୁର୍ଥ ଦିନରେ କୁଚ ବିହାର ଗସ୍ତ କରିବେ ମମତା ବାନାର୍ଜୀ । ଏନେଇ ଆଜି ଏକ ପ୍ରେସମିଟ କରି ସୂଚନା ଦେଇଛନ୍ତି ମମତା । ସେହିଭଳି ଗୁଳିକାଣ୍ଡରେ ପ୍ରାଣ ହରାଇଥିବା ଲୋକଙ୍କ ପରିବାର ଲୋକଙ୍କ ସହ ଭିଡିଓ କନ୍ଫରେନ୍ସ ମାଧ୍ୟମରେ କଥା ହୋଇ ଏପ୍ରିଲ ୧୪ରେ ସେମାନଙ୍କୁ ଦେଖା କରିବା ନେଇ କହିଛନ୍ତି ମମତା । ସେପଟେ ନିଜର ଏକ ଟ୍ୱିଟରେ ମମତା କହିଛନ୍ତି ମଡେଲ କୋଡ ଅଫ କଣ୍ଡକ୍ଟକୁ ନିର୍ବାଚନ କମିଶନ ମୋଦି କୋଡ ଅଫ୍ କଣ୍ଡକ୍ଟ ନାମରେ ନାମିତ କରିବା ଦରକାର ।
