ହାତୀଖୋଜ ତଳେ ଫସଲ

ମୟୂରଭଞ୍ଜ (ବଡ଼ ଖବର ବ୍ୟୁରୋ): ପୁଣି ଲେଉଟିଲା ୩୩ ଟିକିଆ ଝାରଖଣ୍ଡି ହାତୀପଲ । ଗତ ରାତିରେ ଝାରଖଣ୍ଡ ସୀମାନ୍ତ ବାଘବୁଡା ଅଞ୍ଚଳରେ କୋଡ଼ିଆ ନାଳ ପାର ହୋଇ ସାରସକଣା ଅଞ୍ଚଳକୁ ପ୍ରବେଶ କରିଥିଲେ । ବିଲରେ ଧାନ କଟା ଚାଲିଥିବାବେଳେ କେତେକାଂଶରେ ଧାନ କଟା ହୋଇ ବିଲରେ ପଡିରହିଛି । ହାତୀପଲ ଫସଲ ଖାଇବା ସହିତ ଦଳି ନଷ୍ଟ ମଧ୍ୟ କରୁଥିବା ଦେଖିବାକୁ ମିଳିଥିଲା । ହାତୀ ଭୟରେ ସାରସକଣା,ଜଟିଆ ଷୋଳ,କୁଣ୍ଡିଆପାଣି, ବାଘବୁଡା, ମାଲକୁଣ୍ଡା,ଖେରଣା, ଯୋକା, ଅଞ୍ଚଳବାସୀ ଆତଙ୍କିତ ଅବସ୍ଥାରେ ଅଛନ୍ତି । ହାତୀପଲଙ୍କୁ ଘଉଡାଇବାକୁ ବନବିଭାଗ ପକ୍ଷରୁ ପ୍ରୟାସ କରାଯାଉଛି ବୋଲି ବିଭାଗୀୟ ଅଧିକାରୀ ସୂଚନା ଦେଇଛନ୍ତି । ହାତୀପଲ ପୂର୍ବରୁ ବ୍ୟାପକ କ୍ଷତି କରିଥିବାବେଳେ ଏପର୍ଯ୍ୟନ୍ତ କ୍ଷତିଗ୍ରସ୍ତଙ୍କୁ ବନବିଭାଗ ପକ୍ଷରୁ କ୍ଷତିପୂରଣ ଦିଆଯାଇ ନାହିଁ । କେତେକାଂଶରେ ଧାନବିଲରେ ପଶି ଧାନ ଖାଇବା ସହିତ ଏକର ଏକର ଚାଷଜମି ନଷ୍ଟ କରିଦେଇଛନ୍ତି । ତୁରନ୍ତ କ୍ଷତିପୂରଣ ଯୋଗାଇ ଦେବା ପାଇଁ ସାଧାରଣରେ ଦାବି ହେଉଛି ।