‘ମନ୍ତ୍ରୀଙ୍କୁ କଦର୍ଯ୍ୟ ଡାକୁଥିଲେ…ନିଷ୍ପତ୍ତି ନେବାରେ ଅକ୍ଷମ’

ଭୁବନେଶ୍ୱର (ବଡ଼ ଖବର ବ୍ୟୁରୋ): ରାଜ୍ୟରେ ‘ଭଲ ମୌସୁମୀ ବର୍ଷା ହୋଇଛି’ର ଅର୍ଥ ଜଣାନାହିଁ । ‘ନିଷ୍ପତ୍ତି ନେବାରେ ନିଜେ ଥିଲେ ଅକ୍ଷମ’ । ‘କୌଣସି ବିଷୟକୁ ବୁଝିପାରୁନଥିଲେ’ । ନିଜ ନିର୍ବାଚନ ମଣ୍ଡଳକୁ ଯାଇ ‘ବିଧାୟକଙ୍କୁ ଡାକ’ ବୋଲି କହିଥିଲେ । ନିଜ ‘ସମର୍ଥକଙ୍କ ସହ ହାତ ମିଳାଇବାକୁ ଘୃଣା କରୁଥିଲେ’ । ‘ମନ୍ତ୍ରୀଙ୍କୁ ଚିଡ଼େଇବା ଭଳି କଦର୍ଯ୍ୟ ଡାକନାମ ଦେଇଥିଲେ’ । ‘ନକ୍ସଲ ବୈଠକରେ ଭେକଟି ମାଛ ଓ ଖଣ୍ଡ ଖଣ୍ଡ ମାଂସର ଆଇଟମ ଖାଇବା ଚର୍ଚ୍ଚା କରୁଥିଲେ’ । ନକ୍ସଲ ଆଲୋଚନା ବ୍ୟର୍ଥ ବୋଲି ଅନୁଭବ କରୁଥିଲେ । ଏକ ବୈଠକରେ ଚିପସ୍ ଆସିବା ପରେ ଗୋଲାପୀ ନାପକିନକୁ ତନ୍ନ ତନ୍ନ ଦେଖୁଥିଲେ । ନାପକିନରେ ହାର୍ଟ ଚିତ୍ର ଥିବାରୁ ବିରକ୍ତ ପ୍ରକାଶ କରିଥିଲେ । ବିରକ୍ତ ହୋଇ କହିଥିଲେ ଏବେ କ’ଣ ଭାଲେଣ୍ଟାଇନ ଡେ’ ।

ଆପଣ ଯାହା ଶୁଣିଲେ ତାହା ଗୋଟିଏ ପୁସ୍ତକରେ ଲେଖାହୋଇଛି । ଆଉ ଏହି ପୁସ୍ତକକୁ ଲେଖିଛନ୍ତି ପୂର୍ବତନ ଡିଜି ବରିଷ୍ଠ ପୋଲିସ ଅଫିସର ପ୍ରକାଶ ମିଶ୍ର । ତାଙ୍କର ‘କମେଡ଼ି ଇନ୍ ଖାକି’ ପୁସ୍ତକକୁ ନେଇ ଏବେ ସବୁଠି ଚର୍ଚ୍ଚା । ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନାଁ ନେଇ ନାହାନ୍ତି ଅଥଚ ତାଙ୍କୁ ଲକ୍ଷ୍ୟ କରି ନବୀନଙ୍କ ଅକୁହା କାହାଣୀ କମେଡି ଇନ୍ ଖାକି ପୁସ୍ତକରେ ଲେଖିଛନ୍ତି ପୂର୍ବତନ ପୋଲିସ ଡିଜି ପ୍ରକାଶ ମିଶ୍ର । ଦୁଇ ଜଣ ବରିଷ୍ଠ ମନ୍ତ୍ରୀଙ୍କୁ ସେ ‘ନିଗର’ ଡାକୁଥିଲେ । ସାଧାରଣତଃ କୃଷ୍ଣକାୟ ଲୋକଙ୍କୁ ଚିଡାଇବା ପାଇଁ ଏଭଳି ଶଦ୍ଦ ବ୍ୟବହାର କରାଯାଏ । ଖାଲି ଯେ ନେତା ମନ୍ତ୍ରୀ ନୁହେଁ ଅନେକ ଲୋକଙ୍କୁ ଭିନ୍ନ ଭିନ୍ନ ନାମରେ ଡାକୁଥିଲେ ବୋଲି ପୁସ୍ତକରେ ଉଲ୍ଲେଖ ରହିଛି ।