ଚାଷୀଙ୍କ ଆୟ ତୁଳନା ଠିକ ନୁହେଁ :ରଣେନ୍ଦ୍ର ପ୍ରତାପ ସ୍ୱାଇଁ
ଭୁବନେଶ୍ୱର (ବଡ଼ ଖବର ବ୍ୟୁରୋ): ରାଜ୍ୟରେ ମୋଟ ୪୮ ଲକ୍ଷ ୬୫ ହଜାର ୮୫୦ ଜଣ ଚାଷୀ ଅଛନ୍ତି। ସେଥିମଧ୍ୟରୁ ୨ ଲକ୍ଷ ୮୩ ହଜାର ୭୧ ଜଣ ସମ୍ପୂର୍ଣ୍ଣ ଭାବେ ଅନ୍ୟର ଜମି ଉପରେ ଭରସା କରୁଥିବାବେଳେ ୬ ଲକ୍ଷ ୨୨ ହାଜର ୧୧୩ ଜଣ ନିଜର ସହ ଅନ୍ୟ ଜମିରେ ଚାଷ କରୁଛନ୍ତି। ଜାତୀୟ ସର୍ବେକ୍ଷଣ ସଂସ୍ଥା ଦ୍ୱାରା ଚାଷୀଙ୍କ ଆୟ ନିର୍ଦ୍ଧାରଣ କରାଯାଇଥାଏ । ୨୦୧୨ରେ ଚାଷୀଙ୍କ ମାସିକ ଆୟ ୪୯୭୬ ଟଙ୍କା ଥିବାବେଳେ ୨୦୧୯ରେ ଏହା ୫୧୧୨ ଟଙ୍କା ରହିଥିଲା । ତେବେ ୨୦୧୨କୁ ୨୦୧୯ ସହ ଚାଷୀଙ୍କ ଆୟ ତୁଳନା ଠିକ ନୁହେଁ ।
କାରଣ ୨୦୧୮ରେ ତିତଲୀ ଓ ୨୦୧୯ରେ ଫନି ବାତ୍ୟା ଆସିଲା । ସେହିପରି ଖରିଫ ସମୟରେ ମରୁଡ଼ି ଆସିଲା । ଯାହା ସେମାନଙ୍କ ଆୟ ବୃଦ୍ଧିକୁ ପ୍ରଭାବିତ କରିଥିଲା । ଏହି ଅସଂଗତି ଦୂର କରିବାକୁ କେନ୍ଦ୍ର ସରକାରଙ୍କୁ ଅନୁରୋଧ କରିଛନ୍ତି ରାଜ୍ୟ ସରକାର । ଭାଗ ଚାଷୀଙ୍କୁ ଜମି ଥିବା ଚାଷୀଙ୍କ ପରି ସୁବିଧା ଦେଉଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟ । ଯେପରି ଋଣ, ଯନ୍ତ୍ରପାତି କିଣାରେ ରିହାତି, ବିହନ ଯୋଗାଣ. ବଳରାମ ଯୋଜନା ଏହାର ଉଦାହରଣ । ଭାଗ ଚାଷୀ ସିଧାସଳଖ ଧାନ ବିକିବାକୁ ରାଜ୍ୟ ସରକାର ବ୍ୟବସ୍ଥାକୁ ସରଳୀକାରଣ କରିଛନ୍ତି ।
ତେବେ ସେମାନଙ୍କୁ ଜମି ଅଧିକାର ଦେବା ତର୍କର ବିଷୟ । ବିଭିନ୍ନ ସମୟରେ ଏହାର ସଂସ୍କାର ପାଇଁ ପଦକ୍ଷେପ ନିଆଯାଉଥିବା ନେଇ କୃଷିମନ୍ତ୍ରୀ ରଣେନ୍ଦ୍ର ପ୍ରତାପ ସ୍ୱାଇଁ ଗୃହରେ ଉତ୍ତର ରଖିଛନ୍ତି । ଚାଷୀଙ୍କ ଆୟ ନିର୍ଧାରଣ ସର୍ଭେ ପ୍ରତି ୧୦ ବର୍ଷରେ ହେଉଥିଲା । ୨୦୦୨-୦୩ରେ ହୋଇଥିଲା । ତା ପରେ ୨୦୧୨-୧୩ରେ ହେଲା । ହେଲେ ହଠାତ ଏହାକୁ ୬ ବର୍ଷ କରାଗଲା । ୨୦୨୨-୨୩ ବଦଳରେ ୨୦୧୯ରେ ହେଲା ।
ଯାହାକୁ ନେଇ ଗୃହରେ ଉଦବେଗ ପ୍ରକାଶ କଲେ କୃଷି ମନ୍ତ୍ରୀ ରଣେନ୍ଦ୍ର ସ୍ୱାଇଁ । ନିର୍ବାଚନ ବର୍ଷ ଥିବାରୁ ଏହା କରାଯାଇଥିବା ନେଇ ସେ ଗୃହରେ ଅଭିଯୋଗ ଉଠାଇଲେ । ୨୦୧୫-୧୬ ଗଣନା ଅନୁସାରେ, ଅନ୍ୟ ଜମିରେ ସମ୍ପୂର୍ଣ୍ଣ ଭାବେ ଚାଷୀ କରୁଥିବା ଚାଷୀଙ୍କ ସଂଖ୍ୟା ୨ଲକ୍ଷ୮୩ହଜାର୭୧ । ସେହିପରି ନିଜ ଓ ଅନ୍ୟ ଜମିରେ ୬ଲକ୍ଷ୨୨ହଜାର୧୧୩ ଚାଷୀ ଚାଷ କରୁଛନ୍ତି । ରାଜ୍ୟରେ ଚାଷୀ ସଂଖ୍ୟା ହେଉଛି ୪୮ଲକ୍ଷ୬୫ହଜାର୮୫୦ ।