ନନ୍ଦିନୀ ଗୁପ୍ତା ହେଲେ ଫେମିନା ମିସ୍ ଇଣ୍ଡିଆ ୨୦୨୩
ନୂଆଦିଲ୍ଲୀ (ବଡ଼ ଖବର ବ୍ୟୁରୋ): ନନ୍ଦିନୀ ଗୁପ୍ତା ହୋଇଛନ୍ତି ଫେମିନା ମିସ୍ ଇଣ୍ଡିଆ ୨୦୨୩ । ୧୯ ବର୍ଷର ନନ୍ଦିନୀ ମିସ୍ ଇଣ୍ଡିଆ ତାଜକୁ ନିଜ ନାମରେ କରିଛନ୍ତି । ରାଜସ୍ଥାନର ନନ୍ଦିନୀ ଗୁପ୍ତା ଦେଶର ୫୯ତମ ମିସ୍ ଇଣ୍ଡିଆ ଭାବରେ ନିର୍ବାଚିତ ହୋଇଛନ୍ତି। ଏଥିରେ ଭାଗ ନେଇଥିବା ଅନ୍ୟାନ୍ୟ ସୁନ୍ଦରୀମାନଙ୍କୁ ପଛରେ ପକେଇ ନନ୍ଦିନୀ ଗୁପ୍ତା ଏହି ଟାଇଟଲ୍ ହାସଲ କରିଛନ୍ତି।
ସେହିପରି ଦିଲ୍ଲୀର ଶ୍ରେୟା ପୁଞ୍ଜା ପ୍ରଥମ ରନର୍ ଅପ୍ ହୋଇଥିବାବେଳେ ମଣିପୁରର ଥୋନାଓଜାମ ଷ୍ଟ୍ରେଲା ଲୁୱାଙ୍ଗ ଦ୍ୱିତୀୟ ରନର୍ ଅପ୍ ହୋଇଛନ୍ତି । ନନ୍ଦିନୀ ବିଜୟ ହେବା ପରେ ପୂର୍ବତନ ମିସ୍ ଇଣ୍ଡିଆ ସିନି ଶେଟ୍ଟୀ ତାଙ୍କୁ ମୁକୁଟ ପିନ୍ଧାଇଥିଲେ । ଫେମିନା ମିସ୍ ଇଣ୍ଡିଆ ୨୦୨୩ର ଗ୍ରାଣ୍ଡ ଫାଇନାଲ ମଣିପୁରର ଇମ୍ଫାଲ୍ରେ ଅନୁଷ୍ଠିତ ହୋଇଥିଲା।
ଏଥିରେ ଅନନ୍ୟା ପାଣ୍ଡେଙ୍କ ଠାରୁ ଆରମ୍ଭ କରି କାର୍ତ୍ତିକ ଆର୍ଯ୍ୟନ ଓ ନେହା ଧୂପିୟାଙ୍କ ଭଳି ବଲିଉଡ ତାରକାମାନେ ସାମିଲ୍ ହୋଇଥିଲେ। ୩୦ଟି ରାଜ୍ୟ ଏବଂ କେନ୍ଦ୍ରଶାସିତ ଅଞ୍ଚଳର ଯୁବତୀମାନେ ଏଥିରେ ଭାଗ ନେଇଥିଲେ। ନନ୍ଦିନୀ ଗୁପ୍ତା ରାଜସ୍ଥାନର କୋଟା ସହରର ବାସିନ୍ଦା। ନନ୍ଦିନୀ ବହୁ ଦିନରୁ ମଡେଲିଂ ପ୍ରତି ଆଗ୍ରହୀ ଥିଲେ। ନନ୍ଦିନୀ ୧୦ ବର୍ଷ ବୟସରୁ ଫେମିନା ମିସ୍ ଇଣ୍ଡିଆ ଟାଇଟଲ୍ ପାଇବାକୁ ସ୍ୱପ୍ନ ଦେଖିବା ଆରମ୍ଭ କରିଥିଲେ।
