ମାଲକାନାଗିରି (ବଡ଼ ଖବର ବ୍ୟୁରୋ): ମାଲକାନାଗିରି ଚିତ୍ରକୋଣ୍ଡା ସ୍ୱାଭିମାନ ଅଞ୍ଚଳର ବିକାଶ ପାଇଁ ସରକାର ଅଣ୍ଟାଭିଡିଛନ୍ତି । ସ୍ୱାସ୍ଥ୍ୟ ସେବାଠୁ ଆରମ୍ଭକରି ଗମନାଗମନ ପର୍ଯ୍ୟନ୍ତ ବିକାଶର ଧାରା ଅବ୍ୟାହତ ରହିଛି । କିନ୍ତୁ ଲୋକଙ୍କ ମନରୁ ମାଓବାଦୀ ଭୟ ଏଯାବତ୍ ଦୂର ହୋଇପାରିନି । ମାଓବାଦୀଙ୍କ ଭୟରେ ପୁର୍ବପୁରୁଷର ଭିଟାମାଟି ଭୁଲିଯାଉଛନ୍ତି ଗାଁ ଲୋକେ । ଚିତ୍ରକୋଣ୍ଡା ବ୍ଲକ ଅନ୍ତର୍ଗତ ଯୋଡାମ୍ବ, ପନସପୁଟ,ଅଣ୍ଡରାପାଲି,ନାକାମାମୁଡି ପଞ୍ଚାୟତର ପୁଣି ୮୫ ପରିବାର ଭିଠାମାଟି ଛାଡିଛନ୍ତି । ଗତକାଲି ଠୁ ଗାଁ ଛାଡି ସେମାନେ ଚିତ୍ରକୋଣ୍ଡା ଥାନା ଅନ୍ତର୍ଗତ ସରକାରୀ ଫଳ ବଗିଚା ନିକଟରେ ଆଶ୍ରୟ ନେଇଛନ୍ତି । ସ୍ଥାନୀୟ ଲୋକେ ସବୁବେଳେ ମାଓବାଦୀଙ୍କ ଚାପ ଓ ଭୟରେ ରହିଆସୁଛନ୍ତି । ସେଥିପାଇଁ ଜୀବନ ଭୟରେ ସେମାନେ ଗାଁ ଛାଡି ଚାଲିଆସିଥିବା କଥା କହିଛନ୍ତି ।
